喺日本，各式各樣嘅偶像團體多，而想做偶像嘅女仔更多。所以對於有個偶像夢嘅女仔黎講，成功入團係一回事，出道後團體能唔能夠於競爭激烈嘅市場繼續營運又係另一回事。於是你會見到唔少女仔都會於短短幾年時間，因為各種不同原因而不停「轉會」，當中有轉轉下就唔知轉咗去邊，亦有轉出一個成名機會來。好似今晚要介紹呢位「鎌房祐衣」就係其中之一啦。

現年23歲，出身於日本奈良嘅「鎌房祐衣」，最早於2019年8月就已經加入一隊名為「Cotton town」嘅組合出道，但於短短半年後嘅3月，佢就宣佈離團——整個團體於同年7月正式停止活動，所以某程度上「鎌房祐衣」係跳船跳得合時。可惜嘅係，往後幾年「鎌房祐衣」嘅事業發展都唔太順利，2020年8月改名「釜矢桜妃」後成為「EXCESS」嘅創團成員，但團體同樣只活動一年就玩完；然後佢無縫接軌加入另一女團「邂逅のアルカリウム」，點知一年後又同樣成團摺埋。換言之於短短三年內佢就換咗三個團體，而且每團都係停運收場。

好在佢於2023年8月加入「透色ドロップ」之後，演藝事業終於迎來轉機。事關成立於2020年嘅「透色ドロップ」不單止能夠持續營運，仲有能力將「鎌房祐衣」推上《週刊Young Jump》拍攝水著寫真。而雖然「鎌房祐衣」身高僅得148.9cm超級嬌小，但勝在腰短腿長，身材比例優秀而且胸前有肉，所以寫真推出後令佢人氣有所上升。希望未來佢嘅事業都會繼續順風順水啦！

IG：yui___sukiiro