雖然話自2022年起，日本嘅法定成年年齡就已經由20歲改成18歲，但日本民間對於「20歲」呢個年齡始終有份情意結。即使係喺唔少人十幾歲就出道嘅寫真界，「20歲」似乎都係一個重要嘅關口。好似今晚要介紹呢位「赤間四季」咁，近年嘅寫真就不停強調佢依家係「最後的10代」（一字頭嘅年齡）。

今年1月年滿20歲嘅「赤間四季」出生於日本北海道，最早係於2020年9月以當地嘅偶像女團「向日葵プリンセス」嘅成員出道，而且出道幾個月就獲邀於《週刊Playboy》獻出寫真處女作。不過佢嘅首次偶像活動其實頗為短暫，出道唔夠一年佢就於2021年8月宣佈畢業。好在同年年尾佢於《週刊Young Jump》舉辦嘅寫真比賽「ギャルコン2021」中贏到準優勝（亞軍），令佢保持知名度。直到2023年加入現屬團體「#Mooove!」，與我哋之前介紹過嘅「姫野ひなの」成為隊友，同時亦事隔兩年再次為雜誌拍攝寫真。

由此可見，「赤間四季」早於16、7歲時就已經拍緊寫真，年輕應該唔係佢依家最大嘅賣點；另一方面如果按實歲計算，「赤間四季」其實亦已經20歲咗半年有多，早已經唔係「10代」嘅人。不過近來佢為雜誌拍攝嘅寫真，都仲拎緊「10代」黎做賣點——話係舊年佢未20歲之前拍落喎——睇黎「20歲」呢個年齡對於日本人黎講真係有特別意義。

IG：akama.shiki