喺以外表及身材行先嘅日本寫真界（甚至整個娛樂圈都係啦），女性嘅黃金年齡大都坐落於「十零歲到三十零數」之間，過咗呢個年齡段嘅唔係成功轉型，就係選擇引退做返個平凡人。不過今晚要介紹呢位「石岡 真衣」，就係步入三字頭之後先回歸寫真界，而且成績仲相當唔錯！睇黎年齡對佢黎講真係只係數字黎！

1990年出生嘅「石岡真衣」，早於2011年就已經加入經理人公司，曾經為著名女星「篠崎 愛」所在嘅女團「AeLL.」擔任伴舞，同年自己亦以「怪傑!トロピカル丸」成員身份出道。2014年時佢離開原團體，改為加入以「有欠債先可以加入」作招徠嘅另一女團「劇團マーガリンズ」。2015年時又加入團員主要係AV女優嘅「惠比壽麝香葡萄」，並借團體嘅話題性進一步被人認識。加上佢本人自2012年起就有定期推出寫真DVD，雖然唔算大紅大紫，但演藝事業都算係穩定發展。

而或者係因為年紀到，又或者係因為專注於團體活動，「石岡真衣」曾於2020年三十歲當年宣佈寫真引退，甚至仲出埋引退紀念DVD及寫真集。可惜嘅係「惠比壽麝香葡萄」於2022年8月解散，結果當年32歲嘅佢選擇重回寫真戰場，於2023年再次推出寫真DVD，一直到今年35歲都仲喺寫真界奮戰緊。難得嘅係佢保養得相當好，外貌身材依然非常養眼，睇黎仲可以再戰幾年呀！

IG：ishiokamai