為咗要寫「深夜系列」，所以每次我見到啲日本靚女，都會上網搜尋下佢嘅資料，睇下值唔值得同大家介紹。但近日當我搜尋呢位「櫻井もえ」時，Google竟然帶咗我去幾個AV網！咁係咪代表呢位啱啱退團嘅前偶像成員轉戰成人市場？可惜當我睇真啲，先發現一切都係誤會！

先介紹下今篇本嘅主角。雖然「櫻井もえ」從未公佈自己嘅真實年齡，但從佢擁有日本牙齒衞生員證照、而且真係於牙科診所工作過嘅資歷黎睇，佢起碼係20歲之後先轉戰偶像界，依家就應該廿三、四歲左右。「櫻井もえ」最早於2022年作為女團「BUGS MART」嘅創團成員出道，但短短半年內就移藉到另一女團「I MY ME MINE」，直到今年6月退團。期間唔單止團體發展唔錯，佢本人亦曾多次登上寫真雜誌以至《週刊Young Jump》等。亦或者係因為覺得拍寫真更有前途，所以佢於今年6月宣佈退團，上月再上埋《週刊Young Jump》封面，未來可能會於寫真界繼續發展。

咁點解搜尋佢個名會出現AV呢？原因就係有AV女優同佢撞名，而且唔係一個，係兩個。分別係2019年出道嘅企劃單體女優「桜井萌」（讀音一樣），以及2022年於著名成人片商Moodyz出道嘅單體女優「桜井もえ」。兩位女優嘅生涯都唔算非常成功，而且都於一年左右就引退，所以大家唔識係好正常嘅。

一個偶像同AV女優撞名好似有啲尷尬，唯有期望「櫻井もえ」嘅事業發展至少比兩位同名女優好啦！

IG：mooochan46