新J.Law? Margot Robbie的掘起

文：MenClub 魏文青　　
POSTED ON 08 Jul 2016

要數近年最得「民心」嘅荷里活女星，相信唔少人都重注買落「J.Law」Jennifer Lawrence身上。唔理你係鍾意佢喺《Hunger Games》、《X-Men》入面嘅演出、喜歡佢嘅爽直幽默、欣賞佢連續兩年喺奧斯卡上PK、甚至只係因為睇過佢嘅流出照，你都必須要承認呢種女人身男人心嘅女仔真係好性感。不過呢排就「出現」咗個可以衝擊J.Law地位嘅女星！佢就係新．Harley Quinn，Margot Robbie！

今年26歲嘅Margot出生於澳洲，中學畢業之後嘅佢Cold Call澳洲最長壽肥皂劇《Neighbours》嘅製作人，從而贏得一個固定角色。2011年佢轉往荷里活發展，經過多次試鏡之後出演ABC嘅劇集《Pan Am》，不過個劇一季就玩完。好在同月，佢就收到《Wolf of Wall Street》嘅劇本——唔係天降好運，只係因為導演Martin Scorsese將個劇本寄哂畀每一個唔出名嘅荷里活女演員。而係試鏡嘅時候因為Leo開始爆肚，Margot覺得自己都應該要做啲嘢，所以係一個鬧交場面嘅最後，佢唔跟劇本就咁行開，而係一巴車咗落Leo到再加一句「Fxxk You」，結果嬴得角色。
絕大部份人第一次流意到Margot Robbie都係因為睇咗《Wolf of the Wall Street》，而當中又有唔少人(包括我)係因為睇到佢「情挑」Leonardo嘅一幕而被佢吸引到。
而佢今年黎緊仲有《Whisky Tango Foxtrot (中譯:探戈，戰地，威士忌)》、《The Legend of Tarzan(中譯:泰山傳奇)》同萬眾期待嘅《Suicide Squad》。

一頭金髮再加健美嘅身形，外表上Margot有迷倒任何男女嘅條件。但男人其實學精咗好多架啦，淨係靚係唔夠令我哋由心而發地鍾意一個人(由身係OK嘅不過)。Margot嘅真正吸引之處，係佢嘅性格。佢同J.Law一樣都係屬於非常直腸直肚嘅人，就佢憑佢接受訪問時嘅對答，就能夠感到佢係由心黎同主持以及觀眾溝通，而非活喺一個「演員」嘅角色之中。加上佢本身又幽默又可愛，就算只係睇片，你都會忍唔住偷偷扯起，個咀角我指。

另外一樣佢好值得男人愛戴嘅，係佢係一個運動迷。出身於冇雪落嘅澳洲，唔知點解Margot會鍾意玩冰上曲棍球，所以佢去到荷里活之後都加入咗一隊業餘冰曲球隊，得閒亦都會入場欣賞NHL球隊「New York Rangers」嘅比賽。佢仲試過做做下訪問走去睇美式足球比賽嘅比分，絕對係100分女人必備嘅條件啦！

既可以做到《Wolf of Wall Street》中嘅性感金髮美女，又可以做到《The Legend of Tarzan》嘅堅強女性，接住黎仲有《Suicide Squad》嘅瘋狂Harley Quinn，三種唔同嘅女人味集於一身，難怪Margot Robbie可以「威脅」J.Law嘅女神地位啦！