中秋就到，大家又係時候諗下同屋企人去邊做節，而又因為秋天蟹肥膏紅，所以香港多間餐廳、酒店都推出蟹為主題嘅蟹宴！以下就推薦幾間畀大家啦！

Eaton HK 逸東軒 八道菜蟹宴套餐 (每位HK$820，兩位起)

位於佐敦嘅Eaton HK唔單止推動進步思想，入面嘅逸東軒更係獲得多年米芝蓮一星嘅中菜館。最新推出嘅「八道菜蟹宴套餐」就係用上超過一斤的膏蟹，再人手拆肉入饌。頭盤「逸東叄錦碟」中就有酥脆外層內釀入鮮蟹肉、芋蓉、肉碎及洋蔥嘅「香酥脆皮蟹盒」，以及逸東軒必食名菜「明爐蜜汁叉燒」及「話梅車厘茄」。之後又有使用手打蝦膠嘅「珊瑚煎釀鮮蟹鉗」、接兩道貴氣菜色「生拆鮮蟹肉燴燕窩」及「冬瑤蟹肉鮑魚卷」，再加上睇個名就流哂口水嘅「花雕雞油蒸膏蟹」及「薑蓉蟹肉炒飯」。

逸東軒  

電話 : 2710 1093

地址 : 香港九龍彌敦道380號Eaton HK B2樓層

珊瑚煎釀鮮蟹鉗

冬瑤蟹肉鮑魚卷

花雕雞油蒸膏蟹

Eaton HK 普慶餐廳 蝦兵蟹將大鬥法自助餐 (週末晚市 每位HK$618)

同樣係Eaton HK旗下餐廳，食西式自助餐嘅普慶餐廳一樣有蟹食，不過當要煮法就好唔同。「蝦兵蟹將大鬥法」海鮮主題自助餐輪流提供鐘拿蟹、鱈場蟹、花蟹、麵包蟹及三點蟹等頂級蟹類冷盤。同時又有新加坡咖喱炒蟹、鮮茄蟹肉意粉、蠔仔粥式蟹粥、蟹肉沙律及軟殼蟹手卷等多款熱食。

咁叫得做「蝦兵蟹將」，就當然仲有蝦食。冷盤有波士頓龍蝦、小龍蝦、獨特的琵琶蝦，熱食有日式龍蝦卷、泰式炒大蝦、中式醉蝦等，仲未計生蠔、帶子、海膽等其他海鮮！

普慶餐廳

電話：2710 1901

地址：香港九龍彌敦道380號Eaton HK B1樓層

鱈場蟹

新加坡咖喱炒蟹

孔夫子 金秋蟹宴 (每位$530，兩位起)

位於觀塘Club East洞天嘅孔夫子主打新派孔府菜，菜色好食之餘又夠靚，裝修亦見現代感。而中秋推出嘅「金秋蟹宴」提供三款限定蟹食，包括帶出奄仔蟹鮮甜肉味嘅「鹽焗奄仔蟹」，由主廚將鹽炒熱後再放入奄仔蟹焗至全熟，咸香與膏香四溢。

而睇個樣簡單嘅「肉蟹八旗泡飯」就以蕃茄粒、勝瓜粒、大頭菜粒、脆米、蔥花和草菇粒一拼炮製而成，泡飯湯底為孔夫子招牌魚湯，加上新鮮蟹肉提供鮮味。

食蟹嘅另一重點當然係蟹膏，孔夫子嘅「芝士蟹粉焗豆腐 」採用清淡的豆腐配搭濃郁蟹膏，再加芝士焗成金黃色，有咩可能唔好食？

孔夫子 

電話：  3103 3833

地址：  Club East洞天 香港九龍觀塘駿業街58號3樓

鹽焗奄仔蟹

肉蟹八旗泡飯

芝士蟹粉焗豆腐