{ SKIP }
文:李羅渣  
POSTED ON 22 Apr 2017


球季就到尾聲,歐霸四強都全部誕生,最矚目一定係法甲球隊摩納哥事隔14年後再進軍歐聯四強,八強次回合回歸主場再贏多蒙特3-1絕對有說服力。事實上摩納哥今季表現都好出色,法甲越打越有目前同PSG同分,如果入埋歐聯決賽,今季摩納哥都真係雙喜臨門。



同2004年嗰次奇蹟殺入歐聯決賽比較,兩隊摩納哥最相似嘅就係同樣有失意前鋒重生。2004年就有喺皇馬借返嚟嘅摩連迪斯,當時佢要同同胞魯爾同朗拿度兩個世界級射手競爭,想有出場機會當然難上加難,最後被皇馬外借摩納哥。你以為摩連迪斯真係唔夠班?佢就親身證明自己嘅實力,喺八強倒戈皇馬兩回合都有入球,直接踢走放棄自己嘅球隊黎證明自己。值得一提嘅係因為皇馬呢次自作自受,令往後唔少球會外借球員時都加入唔可以倒戈嘅條款。更威水嘅係,雖然摩納哥當年決賽輸俾摩連奴帶領嘅波圖飲恨,但摩連迪斯就成為嗰屆歐聯神射手。



而今季呢隊摩納哥,一樣有失意前鋒咸魚翻生,講緊嘅係哥倫比亞前鋒法卡奧。法卡奧一度係轉會市場大紅人,唔少大球會都想引入呢位入球機器,可惜2014世界盃前重傷後,外借曼聯同車路士都極之唔順利,最後唯有諳然回歸摩納哥。舊年夏天仲有傳摩納哥可能會繼續外借其他球會,不過最後都無成事。不過又估唔到老虎返到嚟又打得返起,目前喺法甲入咗18球,而歐聯都有6球進賬,無論法甲定歐洲賽,法卡奧都係摩納哥嘅進攻主力,加上有「新亨利」之稱嘅基利安洛天,摩納哥攻力非同少可!。



摩納哥喺四強將會面前祖雲達斯,嚟到呢個階段,大家都係實力同運氣兼備,都無話好籤唔好籤,或者祖記實力不如皇馬或者馬體會,不過老婦人失落歐聯冠軍近20年,今次嚟到四強一定搏盡。祖雲達斯防守唔係人咁品,摩納哥領隊渣甸就話唔會放棄進取嘅打法,既然係咁,就祝你好運啦。


李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青。

 


如果大家有印象,Switch 2剛開賣嗰陣,我哋曾經報導過美國一間GameStop分店喺交付預購主機時,因為將收據直接釘喺包裝盒正面,結果粒釘穿咗紙盒,導致螢幕受損出現兩個小洞,引起機迷熱烈討論。最近,GameStop就嘗試 ...
hobby
【出色公關?】GameStop拍賣「破洞Switch 2」及涉事釘書機 所得收益將捐贈慈善機構
11 Jul 2025
想當年大家睇住橋本環奈憑著「奇蹟的一杖」成為「千年一遇美少女」而爆紅,估唔到話咁快佢就已經長大到要談婚論嫁嘅年紀。據日本雜誌報導,環奈BB已經接受拍拖三年嘅男友中川大志求婚,二人不但連家長都見埋而且已經 ...
hobby
【悲報】前排分手實為煙幕? 傳環奈BB將嫁中川大志
10 Jul 2025