{ SKIP }
文:MenClub Mr.波特  圖:互聯網
POSTED ON 22 May 2017



朗拿度呢個大名相信作為球迷嘅你又點會未聽過呀,不過請留意呢度講緊嘅朗拿度係已經退左役,人稱「外星人」或「大哨」嘅巴西9號仔個一位,而唔係宜家仲係球壇叱咤風雲個個C朗拿度。




「肥朗」可能係宜家你對朗拿度嘅印象,不過處於巔峰期嘅朗拿度,就絕對係足球史上最強嘅前鋒之一,亦可以話係巴西繼球王比利之後最強大嘅前鋒。



現年40歲嘅朗拿度,喺2011年2月嘅時候已經掛靴,轉眼間已經離開球場6年時間,除左2014年曾擔任巴西世界盃嘅宣傳大使外,就無再投身球壇。直至去年有傳過大哨重返皇馬擔任球隊嘅形象大使,但最終係咪真係回歸,就好似無左下文。



不過呢啲都唔係重點,講番球員時代嘅大哨先係我Mr.波特今次想講嘅野。



喺巴西出生嘅朗拿度,13歲進入Sao Cristovao嘅青年軍進行訓練,其後喺16歲獲巴西傳奇渣先奴推廌,成功獲得巴甲球隊高士路提供首份職業球員合同。喺進入高士路後,朗拿度隨即展現佢嘅入球天賦,喺1993-94年期間,佢一共為高士路上陣左47場比賽,攻入44球,效率令唔少人相當震驚。不過有傳當時正在尋求職業合同嘅朗拿度,竟然被佢兒時最愛嘅球隊法林明高拒絕,相信呢件事應該對法林明高黎講都係一次黑歷史。


1993年,朗拿度成功入選巴西17歲以下國家隊,而喺成為17歲以下國腳後,朗拿度一共為國家隊上陣了57場比賽攻入59球,其入球能力令一眾歐洲豪門流晒口水,並開始對呢位小伙子非常關注。同年12月,朗拿度首次入選巴西國家隊,晉身大國腳行列。就係因為這次入選,令朗拿度有機會參加1994年喺美國舉行嘅世界盃,不過當時嘅佢就只係一位無名小卒,所以成個世界盃佢都只係一名大後備,無上陣過1分鐘。不過作為成員之一,朗拿度都係隨巴西隊奪得呢一年嘅世界盃冠軍,相信個個時候無人會相信呢位坐喺後備席嘅球員會係未來世界最強嘅前鋒之一。



就喺奪得世界盃冠軍之後,朗拿度受到荷甲球隊PSV燕豪芬垂青,正式轉投至歐洲聯賽呢個更大嘅舞台。雖然聯賽嘅水平提高左,但卻無法阻止朗拿度繼續入球,呢位前鋒亦開始進化成「外星人」。佢喺PSV嘅第一季,已經如入無人之境,上陣36場高效攻入35球。即使第二季有傷在身,但朗拿度仍然喺上陣21場比賽下攻入19球,效率依然強勁,更重要嘅係佢成功為PSV拎到荷蘭盃冠軍,係朗拿度喺歐洲賽場上嘅第一個冠軍獎盃。



就喺進入歐洲短暫嘅兩年時間,朗拿度已經令一眾歐洲豪門虎視眈眈,最終西甲班霸巴塞隆拿成功以當時破紀錄1320萬鎊轉會費羅致到呢位神鋒。而呢位巴西前鋒果然無令巴塞失望,佢單季上陣49場攻入47球,其中喺西甲聯賽則上陣37場攻入34球,其中包括由半場盤球扭過多名守衛嘅金球就係呢一年出現。


而喺巴塞呢一季,朗拿度成功帶領球隊喺歐州杯賽冠軍杯擊敗決賽對手巴黎聖日耳門,奪得冠軍。同年,朗拿度以20之齡成功當選為FIFA世界足球先生,係呢個獎項有史以黎最年輕嘅得獎者。



雖然喺巴塞嘅第一季已經相當成功,但係佢只係短暫效力呢支西甲班霸一季就離開了。離開巴塞嘅朗拿度以再破紀錄嘅1950萬鎊轉投意甲球隊國際米蘭,有傳今次離隊係因為朗拿度嘅私生活唔檢點,故令巴塞管理層唔太滿意,所以被迫賣走佢。


轉投國米後,朗拿度終於可以定落黎一段時間,而佢亦沒有任何唔適應嘅地方,效力國米嘅第一季已經攻入34球,並為球隊帶來了歐洲足協盃冠軍,同時佢個人亦收獲歐洲金靴獎、金球獎以及連續第二年獲得世界足球先生。

呢個時候嘅朗拿度,已經成為歐洲最強前鋒,而巴西隊亦以佢為首,其中喺1998年嘅世界盃,佢就不負眾望成功帶隊殺入決賽,但可惜嘅係佢遇上如日中天嘅施丹,最終巴西以0:3落敗,呢位巴西球王就係咁輸左比法國球王。


不過4年之後,朗拿度捲土重來,以絕對核心嘅身份再一次帶領巴西隊殺入世界盃決賽,而今次朗拿度終於沒有令球迷失望,憑住佢個人梅開二度,巴西喺決賽以2:0擊敗德國,再一次捧走世界盃,而呢一次亦係朗拿度真真正正靠自己實力帶黎嘅世界盃冠軍。

就係世界盃之後,朗拿度再一次轉會,今次佢轉投嘅係西甲另一支班霸皇家馬德里,而轉會費為4600萬歐元。值得一提嘅係,當朗拿度轉會皇馬後,佢嘅皇馬球衣銷售額隨即打破當時所有紀錄,係足球史上最史無前例嘅一次。而加入皇馬,亦令皇馬組成了令唔少人難以忘記嘅「6條A」組合,震驚歐洲。


朗拿度係皇馬效力5個球季,一共上陣177場攻入104球,係佢生涯入面交出最多入球嘅球隊,而期間佢主要為皇馬帶黎兩次西甲聯賽冠軍。係皇馬效力嘅最後一季,朗拿度嘅身體已經開始不行,不同大小嘅傷勢都向佢侵襲,令佢唔可以長期上陣,最終只能被皇馬送走。


離開皇馬,朗拿度再一次重返意甲,但佢今次加盟嘅係AC米蘭,但由於佢仍然有傷在身,所以兩個賽季加埋就只係上陣20場攻入8球,當時黎睇佢嘅職業生涯真係已經要完結啦。


黎到生涯晚期,朗拿度決定重返巴甲,並成功加入哥連泰斯。而作為曾經最強嘅前鋒,朗拿度並無只想過退休生活,佢係加盟第一季為球隊上陣38場攻入23球,並成功為哥連泰斯帶黎巴西杯及巴西洲聯賽兩項冠軍。

朗拿度作為前鋒,擁有驚人嘅爆發力、速度、盤扭能力、左右腳都可以開弓,基本上算得上係毫無瑕疵,如果佢身體無咁多傷患,相信佢嘅成就將會更大,甚至可以成為巴西真真正正嘅球王。不過,宜家呢一個嘅朗拿度,已經可以被認為係歷史上最強嘅射手之一,亦係巴西歷史上最強大嘅9號仔!

朗拿度生涯最後一個入球

由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024