- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
插花係唔少球員都會用嘅招數，使用嘅球員可以好好咁保護住個波，同時佢亦可以令防守球員失去平衡，從而擺脫防守。當然，有一啲球員亦都經常插花，但係就會被人話只係識插爛花，毫無實際作用。而如果要數足球歷史上嘅插花王，你又諗起邊個呢？朗拿甸奴？施丹？朗拿度？如果講諗起插花就諗起佢嘅真正插花王可能係佢 - 丹尼臣(Denílson)。 | |
| 現年39歲嘅丹尼臣黎自巴西，佢擁有巴西球員一向具備嘅腳下功夫，而佢球員生涯亦好似專門研究插花一樣，擁有統治級別嘅超強控球能力，要搶到佢個真係一啲都唔容易，小編最記得丹尼臣嘅就係2002年世界盃巴西為左拖延時間，佢一個人控球竟然惹黎4名球員黎搶球，搶球嘅就係知道單憑一兩個人係無辦法輕易搶到佢個波架。 | |
| 講番丹尼臣嘅生涯，佢絕對唔算得上係咩超級球星，但係佢效力嘅球隊亦都拎過唔少冠軍。1977年出世嘅佢，以17歲之齡加入巴西當地著名球隊聖保羅，司職翼鋒。岩岩加入球隊第一年就成功隨隊拎到南美足協盃冠軍。當然，丹尼臣個陣完全係大後備，上陣次數亦寥寥可數。 | |
| 直至第二季開始，丹尼臣嘅上陣機會終於增加，之後平均一季可以上陣10幾場比賽，但係入球數字唔多，效力聖保羅4個球季只有5個入球。雖然唔算得上係入球機器，但係丹尼臣卻被西甲球隊畢迪斯睇中，以當時破紀錄轉會費2150萬鎊轉會。 | |
| 加盟畢迪斯後，丹尼臣成為球隊嘅必然正選，但係作為世界最高轉會費嘅球員，佢嘅表現就算唔上好驚豔，一季平均都只係入到2-3球，而畢迪斯亦唔見交出好好嘅成績，唯獨2004-05球季，佢地成功奪得國王盃冠軍，係丹尼臣效力畢迪斯7季期間唯一嘅錦標。 | |
| |
| 2005年丹尼臣離開畢迪斯轉投法甲嘅波爾多，喺佢嘅加盟下，波爾多最終呢一季以第2名身份完成聯賽，不過其實距離冠軍里昂足足相差15分之多。完成喺波爾多嘅第一季賽事後，由於球隊未能滿足丹尼臣嘅薪金要求，所以佢亦只好離隊，轉投沙特阿拉伯聯賽搵錢。 | |
| 喺沙特踢左幾個月比賽後，丹尼臣再次轉戰其他聯賽，今次係黎到美國大職盟，佢加盟嘅係達拉斯隊。不過，由於其後丹尼臣嘅表現不濟，所以佢被球隊剔出陣容名單之外，最終佢亦未能留隊，並重返巴西聯賽加盟彭美拉斯。 | |
| 重返巴西後，丹尼臣嘅表現略見回勇，雖然佢整季都只係以後備身份上陣，但係佢係球隊後備陣容入面一位主要嘅球員，喺佢嘅坐陣下球隊亦成功奪得巴西聖保羅州聯賽冠軍。 | |
| |
| 喺彭美拉斯效力一季後，丹尼臣同球隊終止合約，其後轉投另一支巴西球隊效力短短3個月時間。其後佢又轉戰越南聯賽，簽約6個月薪金達到550萬美元。而首次為該支越南球隊上陣時，佢就射入左一記自由球，但就只限一場貨仔，因為佢之後就決定離開呢個地方。2010年，丹尼臣與希臘球隊簽約兩年，但只係效力左球隊3個月，佢就被球隊裁掉，期間沒有參加過一場比賽。 | |
| 相比起聯賽嘅成績，丹尼臣喺效力巴西國家隊嘅成績就輝煌得多，當然呢個係有賴佢身邊一班超級隊友啦。從1996年起，丹尼臣就成功進入巴西國家隊，其後一直效力至2003年，期間合共為球隊上陣61場攻入8球。效力巴西國家隊，丹尼臣唔係一哥，充其量只係球隊嘅主要輪換球員，但係球隊每次比佢上場，基本上都係基於一個好大嘅原因，就係拖延時間。 |
| |
| 講到拖延時間，以巴西隊黎講當然係因為佢地領先啦，呢個時候為左唔好浪費前鋒球員嘅體力去進攻，又或只顧住防守擔心被對方乘虛而入，所以拖延時間就係最佳嘅選擇。但係要拖延時間亦唔係講咁易，因為需要球員擁有極強嘅控球能力，亦要面對對方嘅強力迫搶，而喺呢一方面丹尼臣就做得非常好，佢往往可以喺角球旗附近又或邊線不斷插花、盤扭，防守球員好難可以搶到佢個波，最多可以做嘅就係將個波鏟出界，但係咁樣就正中丹尼臣嘅計，因為可以浪費更多嘅時間。 | |
| 最終，喺2002年丹尼臣成功隨巴西隊奪得世界盃，一嘗世界冠軍滋味。而除左世界盃之外，丹尼臣亦曾隨巴西奪得美洲國家盃冠軍及洲際國家盃冠軍，其中佢喺洲際國家盃入面更加成為金球獎得主。 | |
| 回想當年嘅丹尼臣，雖然佢嘅插花唔可以話好實際，甚至好多人都認為佢係華而不實，但係其實單論觀賞性佢嘅動作真係好吸引，亦都唔係太多球員可以做到好似佢咁，大佬咁樣插花真係冒住比人鏟斷腳嘅危險架。所以話真正算得上係插花王嘅，應該就非丹尼臣莫屬啦！ | |
|