曼聯隊長朗尼終於喺一片紅魔球迷歡呼聲中重投母會愛華頓嘅懷抱，週薪15萬鎊雖然比起效力紅魔期間大幅減少，但仍然係「拖肥糖」隊內嘅第一高薪，對於一位已經過左30歲，以及狀態明顯已不復當年勇嘅球員，今次愛華頓嘅出價絕對可以被認為係一次念舊價。對於唔少曼聯球迷黎講，球隊終於能夠送走「月巴」絕對係一件值得開香檳嘅事，不過其實回顧番朗尼喺曼聯嘅時光，佢絕對係紅魔鬼歷史級別嘅存在，佢嘅成就亦絕對對得起佢嘅球隊。