【接棒】卡域克成紅魔鬼新任隊長

文：MenClub Mr.波特　　圖：互聯網
POSTED ON 13 Jul 2017


31歲嘅朗尼正式結束自己13年奧脫福生涯，重返母會愛華頓效力。而本來作為曼聯隊長嘅朗尼離去，亦代表球隊需要重新選一位新隊長，而最終曼聯官方宣佈新球季隊長將由中場卡域克擔任，而副隊長就由安達靴里拉擔任。

曼聯作為世界上最受歡迎嘅球隊之一又係傳統豪門，所以一位球員能夠出任呢支球隊嘅隊長絕對係一份光榮。而岩岩離開球隊嘅朗尼就係由2014年開始出任紅魔鬼隊長的，當時嘅佢雖然只有28歲，但係2004年加入曼聯嘅佢就係陣中擁有最老資格嘅球員，所以搵佢做隊長亦都非常適合。

而朗尼走左之後，曼聯就決定搵卡域克做新任隊長，而呢個決定相信亦無任何人會反對，因為2006年加入曼聯嘅佢係目前紅魔陣中最老資格嘅球員。35歲嘅卡域克已經加入曼聯11年，近年因為年齡關係而傷病增加，上陣次數隨之大減，不過咁樣亦都唔影響佢目前作為曼聯老大哥嘅身份。

效力曼聯11年期間，卡域克為球隊上陣左459場比賽攻入24球，一共帶黎1次歐聯冠軍、5次英超冠軍、1次足總盃冠軍、3次聯賽盃冠軍、6次社區盾冠軍、1次歐霸盃冠軍以及1次世冠盃冠軍。而喺2012-13球季，卡域克憑住出色嘅表現成為曼聯年度最佳球員。

不過以卡域克目前嘅年齡及狀態，相信佢亦都唔可以做到好耐隊長啦，而近20年黎做得曼聯隊長最耐嘅球員唔知你又記唔記得呢？佢就係曼聯傳奇火爆中場堅尼啦，佢由1997年起擔任曼聯隊長，直至2005年離隊卸任隊長一職，一共做左8年隊長咁耐呢！

近20年曼聯隊長： 1996－1997 簡東拿 1997－2005 堅尼 2005－2010 加利尼維利 2010－2014 維迪 2014－2017 朗尼 2017－現在卡域克