【炸裂！】世紀之戰發佈會，Mayweather同McGregor正式碰面！

文：MenClub Mr.波特　　圖：互聯網
POSTED ON 12 Jul 2017


Mayweather同McGregor嘅「世紀之戰」將於今年8月26日喺美國拉斯維加斯舉行，此前有關二人嘅訓練影片亦不斷流出，可以睇到兩人為左呢場大戰正全力備戰中。而黎到今日，大會正式舉行賽事嘅新聞發佈會，兩位選手亦首次同場現身，期間雙方更正面對話，火藥味甚濃！

呢場「世紀之戰」大會亦相當重視，佢地將舉行4場巡迴新聞發佈會，而今日呢個係首站，地點係洛杉機，之後另外三個地點則分別為加拿大嘅多倫多、紐約市布魯克林同埋英國倫敦。

睇番今日呢場新聞發佈會，雖然未係正式比賽日，但係現場已經聚集左非常之多嘅支持者，可以話基本上全場爆滿，所以可想而言比賽當日呢場「世紀之戰」究竟會幾受關注，據報導指呢場比賽嘅價值將達到5億美元，實在係非常之咁誇張。

喺發佈會上，28歲嘅MMA選手McGregor首先上台，佢雖然穿起一身西裝，但係仍然可以感受到佢作為格鬥選手嘅殺氣。上台之後，McGregor喺台上面不斷游走，神情顯得非常輕鬆。之後就輪到Mayweather上台，呢位「不敗拳王」穿起一身輕便服裝，帶上Cap帽，面無表情，心情好似好沉重咁。

當上到台後，二人對望好一段時間，之後McGregor開始動作多多挑釁對方，但係Mayweather就完全不為所動，沒有進行任何反擊。其後輪到二人出黎公開發言，McGregor繼續佢好不可一身嘅輕鬆態度發言，佢更揚言自己將可以喺4回合入面令對方失去知覺，而如果唔係用拳擊賽例，佢認為自己可以一回合入面就可以勝出，而Mayweather就坐係佢後面繼續好認真咁。之後到Mayweather發言，坐係後面嘅McGregor拎住咪進行回應，呢個時候雙方開始有啲火藥味。期間，Mayweather更突然拎出一張寫住1億美元嘅支票出黎示威，希望可以比啲下馬威McGregor睇！

發言完畢後，二人一齊站喺台前中間位置，互相貼近進行垃圾話互噴，今次Mayweather終於按耐不佳全力回擊McGregor，兩人針鋒相對咁互罵，火藥味黎到頂點，最後需要工作人員將雙方分開，對罵先可以終止。

接下來二人將會繼續進行發佈會，相信屆時佢地只會繼績加添火藥味，令比賽嘅關注度進一步提高，究竟比賽日兩位可以交出一場有幾精彩嘅賽事呢？真係太令人期待啦！
另外，喺接待媒體嘅記者會上，Mayweather嘅父親與McGregor亦進行左一段垃圾話對決，年輕嘅McGregor就談笑風生，相反Mayweather父親就相對好似激動得多啦！