【忠誠】托迪不考慮加盟海外聯賽，將留羅馬擔任行政人員

文：MenClub Mr.波特　　圖：互聯網
POSTED ON 17 Jul 2017


如果要你諗一位足球界入面最忠誠嘅球員，你會諗起邊個呢？馬甸尼？保方？除左呢兩位之外，我諗羅馬王子托迪亦絕對係最忠誠嘅代表之一，因為佢成個職業生涯就只係效力羅馬一支球隊。

喺2016-17球季接近完結前，羅馬官方代表稱現年40歲嘅托迪將會喺賽季完結後結束喺羅馬嘅球員生涯。其實托迪本人就未想掛靴嘅，佢今次可以話係「被掛靴」的，所以有傳托迪將可能會離開羅馬轉投其他次級聯賽，好似美國大聯盟咁繼績球員生涯。

而喺聯賽最後一場比賽結束後，羅馬為托迪舉行左一個榮優儀式，喺過程期間托迪亦忍唔住流出男兒淚，令到唔少唔捨得佢嘅球迷亦同佢一齊喊，場面真係非常之咁感人。雖然今次托迪係「被掛靴」，但係呢位王子仍然好愛呢支球隊，並感謝球隊多年黎嘅栽培。

當以為托迪可能會首次離開羅馬轉戰其他聯賽嘅時候，有消息指佢始終唔想離開羅馬，所以已經否決加盟美職嘅可能，並且即將重返羅馬加入球隊作為行政人員之一。雖然宜家托迪亦說明自己仲未同羅馬有任何有關擔任行政人員嘅簽約，但係佢就相信自己即將會成為其中之一。

托迪能夠重返球隊，絕對係球迷們一大喜訊，雖然佢以後唔會再以球員身份現身，但係佢就依然係羅馬嘅圖騰，係球隊永遠嘅旗幟代表。

其實對於托迪無意加盟美職一啲都唔意外，因為佢喺球員生涯期間亦曾拒絕加盟好似皇馬嘅大球會邀請，一心只想效力羅馬一支球隊。托迪職業生涯一共效力左羅馬25年，上陣比賽場次達到786場攻入307球，期間協助球隊奪得過1次意甲聯賽冠軍、2次意大利盃冠軍以及2次意大利超級盃冠軍。