【愛運動】首屆香港運動消閒博覽開幕啦！

文：MenClub Mr.波特　　圖：互聯網
POSTED ON 21 Jul 2017


較早前一年一度嘅香港書展已經喺灣仔會展開幕，而相隔兩日後同樣喺會展舉行嘅首屆香港運動消閒博覽亦都正式開幕。今次香港運動消閒博覽並唔需要額外門票，你只需要持有當日書展嘅門票，就可以同時進入兩個展覽會場。所以各位熱愛運動嘅朋友絕對可以去到現場睇下，有野玩、有野睇、有野買，相信總會喺當中搵到岩心水嘅野。

今次首屆香港運動消閒博覽一共設有6大展區，其中包括「戶外體驗」、「運動營」、「健康與健身」、「攝影世界」、「樂遊天地」及「手工藝墟」，當然呢6個展區唔係樣樣都關運動事，但係大家行開嘅都可以睇下，隨時執到好野呢。

唔好講咁多，即刻同大家睇下展場入面有啲咩！

一入到會場最吸晴嘅就係一個「抱石骰仔」，對攀石感興趣嘅朋友可以排隊試下玩，因為高度只有3.9米，所以難度唔算好高，現場亦有專業教練陪同，所以危險性唔高，小朋友亦都可以參與。

而再行下就見到一個全場最大嘅攤位，佢地現場設有唔同嘅運動供市民試玩，好似引體上升、跳繩、地壺、單車發電等，另外佢地亦設有VR體驗區，入面有唔同嘅運動可以試玩，好似籃球、拳擊等等，內容相當豐富。

除左啲比較大路嘅運動，現場亦有啲平時較為難接觸嘅運動可以試玩，其中就包括哥爾夫球，沙壺、桌上足球等，未試過嘅朋友黎到可以試一試，機會真係難得架。

而除左玩之外，當然仲有好多運動用品公司喺會場入面，無論係運動衫褲、器材、裝備等一應俱全，有無特別平就等你地自己入黎發掘下啦。
另外，現場亦設有珍貴簽名球衣展，其中包括美斯、C朗拿度、尼馬、巴利、古天奴等人，大家去到真係要影張相留念下！
第1屆香港運動消閒博覽日期：2017年7月21至25日（星期五至星期二）時間：7月21至24日– 上午10時至晚上8時 7月25日– 上午9時至下午5時地點：香港會議展覽中心大會堂票價：持有當日有效書展門票，便可一票通行，同時進入香港運動消閒博覽的的會場書展門票：成人：25元、小童：10元 *3歲或以下小童及65歲或以上長者免費進場