【最新消息】尼馬即將天價加盟巴黎聖日耳門？！

文：MenClub Mr.波特　　圖：互聯網
POSTED ON 25 Jul 2017


近日轉會市場不斷有傳巴塞隆拿巴西前鋒尼馬有可能離隊，而呢個消息可能真係成為現實，因為今日有消息指尼馬已經接受左法甲球隊巴黎聖門開出嘅合同，佢即將會離開巴塞加入呢支法甲班霸成為球隊嘅新一哥。

由於有指尼馬已經唔想再喺美斯嘅陰影下踢波，佢想成為球隊嘅第一核心，所以一日唔離開巴塞佢都無呢個機會。如今聖日耳門提供嘅就係呢個球隊核心嘅機會，只要佢加盟球隊就會以佢為核心黎建隊。尼馬同巴塞嘅合同入面有買斷條款，金額為2.22億歐元，所以聖日耳門真係能夠帶走尼馬嘅話，咁相信應該唔會少過呢個金額，而有消息指聖日耳門為左收購尼馬所開出嘅金額將超過2億歐元。

現年25歲嘅尼馬2013年加入巴塞，效力球隊4年期間一共上陣左186場比賽攻入105球，雖然平均黎講佢嘅表現都係相當出色，但係岩岩一季佢嘅表現就明顯回落，上陣45場比賽只係攻入20球。受制於巴塞戰術一面倒傾向美斯，尼馬喺球隊嘅前線上面最多只可以算係二哥，甚至可能比蘇亞雷斯比下去添。所以為左未來爭奪金球獎殊榮，擺脫美斯係尼馬必須做嘅事。

加入聖日耳門，代表尼馬將成為球隊前鋒線上嘅第一尖刀，而適奉球隊上季失去左伊巴謙莫域呢位神鋒之後，雖然卡雲尼仍然有住出色嘅入球能力，但係最終佢地都係失落左聯賽錦標，如今加入尼馬之後將可以進一步加強球隊嘅攻擊力。另外，尼馬亦唔需要擔心喺聖日耳門嘅適應，因為球隊入面有唔少巴西兵，其中包括球隊後防大將泰亞高施華、馬昆奴斯，仲有中場盧卡斯，另外仲有岩岩由祖雲達斯加盟嘅丹尼爾艾維斯，所以呢班巴西兵一定會照住尼馬。

而目前雖然轉會仲未有官方消息，但係今晚兩支球隊都會分別相隔30分鐘咁召開記者會，所以好大機會就係宣佈尼馬嘅加盟同埋離隊。不過有一個重要嘅問題就係，究竟巴黎聖日耳門點樣去比2.22億歐元出黎呢？要知道之前世界最高轉會費嘅球員普巴亦都只係去到1億歐元，但係今次尼馬一跳就多出普巴一倍有多，呢個天文數字真係令人難想像！