《數碼暴龍》20週年紀念金幣…散紙包

文：MenClub 魏文青　　
POSTED ON 10 Aug 2017

繼續係《數碼暴龍》20週年嘅紀念品系列，繼之前出過復刻數碼暴龍機、手錶同卡片盒之外，今次佢Bandai推出嘅竟然係近年少見嘅紀念金幣！咦咪住先…睇真啲，原來推出係個金幣背後嘅散紙包…？

嗱呢件貨嘅全名係「《數碼暴龍》20週年高級皮革散紙包」，所以散紙包先係本體，而好搶眼嘅金幣只係送嘅啫。散紙包本身係真牛皮製作，再由日本達人染成黑、白、啡三色並且人手縫合。壓紋就係模仿初代數碼暴龍機上嘅磚牆花紋。大小方面係8cm見方，打開之後會好似個盒咁，靚就係幾靚，但個人經驗黎講，呢個設計其實就唔係放到好多散紙嘅啫。

之於個紀念金幣呢，首先就冇「金」嘅，但就有渡辺けんじ畫嘅初代數碼暴龍「巨龍獸」同「機械暴龍獸」浮雕，另一面就有20週年字樣。直徑有38mm，比起日本嘅500Yen大銀都仲要大，做裝飾品都唔錯。另外仲有送渡辺けんじ畫嘅機械暴龍獸簽名畫板。

以上所有嘢加埋要12960Yen，即係約915HKD。九舊幾水買個散紙包就緊係唔平，但如果你理解做買紀念金幣、送散紙包，畀錢嘅時候會唔會心安理得啲？
P-Bandai.jp