文：MenClub 魏文青 POSTED ON 16 Aug 2017
高達迎黎40週年，就點都有啲搞作嘅，近日就有兩單關於《高達》作品嘅消息值得大家注意，包括《The Origin》第五集劇場版嘅11分鐘預告公開，同埋日本方面報導官方會高清重製40年前嘅原裝動畫！
VIDEO
一切一切，其實都要拉返落去今年69歲、原裝動畫監督兼人設、《The Origin》漫畫版作家兼劇場版總監督安彥良和老師身上(小吐糟：個朵咁長唔知以為佢喺Game Of Thrones走出黎)。安彥良和老師由2001年開始創作《The Origin》，喺《高達》劇情之上加入、修改唔少劇情，成為與動畫版相似但又別有風味嘅作品。隨後講述一年戰爭之前事情嘅《The Origin》劇場版於2015年開始上映，黎緊9月會於已經係第五集，講到去宇宙世紀最大規模艦戰、令馬沙被冠上「紅色彗星」之名嘅「魯姆會戰」。
另一個更重要嘅消息，就係因為安彥良和老師向日本傳媒表示有意向正傳埋手，因為佢覺得當年嘅動畫因為預算同時間問題，原裝動畫完成度其實唔高，即使佢認為原裝動畫係最重要，但又真係唔好意思展示畀後生一輩睇。亦指如果唔重製原裝動畫，「就好像撒了謊」似的。言下之意即係想以《The Origin》嘅技術重新製作原裝動畫。或者會於2019年、動畫播放40週年紀念時播放。
講真，當年嘅高達動畫放喺現今被「寵壞」嘅觀眾眼中，畫面、作畫質素都真係可以用慘不忍睹黎形容，如果真係以高清、CG重製，相信對於各位UC迷、元祖粉嘅傳教事業會好有幫助！兩年時間話長唔長，大家就耐心等下，同埋祈求安彥老師身體健健康康啦！ Livedoor News
