【新王登基！】尼馬2入球2助攻，聖日耳門大勝！

文：MenClub 波特先生　　圖：互聯網
POSTED ON 21 Aug 2017

今年夏天，相信最多人關注嘅足球消息必定係尼馬以天價2.2億歐元由巴塞隆拿轉投法甲豪門巴黎聖日耳門，而近日佢就代表新東家上陣第2場聯賽，表現相當搶眼，相信一定令球隊上下都認為呢2.2億歐元真係花得抵！

雖然唔可以證實尼馬出走巴塞嘅原因係100％想逃離美斯嘅陰影，但係無疑尼馬留喺巴塞卻確實係被美斯壓住，就算尼馬表現點好，球隊目前嘅核心位置都絕對只有美斯一人，呢個情況相信係未來2-3年應該都會一樣。

出走巴塞將令尼馬獲得全面解放，因為新東家將會以佢為球隊嘅絕對核心，並將會圍繞佢黎建隊，而佢喺比賽入面將獲得一切主導權，只要佢想基本上佢可以無限控球，以及決定點樣進攻。

而岩岩聖日耳門同圖盧茲嘅一場聯賽入面，尼馬就完全展現出自己作為核心嘅能力。雖然聖日耳門喺上半場18分鐘率先失波，但係比賽31分鐘，尼馬把握對方後防嘅大意，近門執雞成功，將比數扳平。

相隔4分鐘之後，尼馬同隊友納比治做左個one two，後者喺禁區踢起腳射出割草式嘅勁射破網，成功反超對手2：1。

下半場，雖然聖日耳門方面有華拉堤紅牌被逐，但係比賽嘅主導權仍然喺聖日耳門手上，及後佢憑住卡雲尼嘅12碼再下一城，成功領先至3：1。雖然之後圖盧茲憑住角球追番一球，但好快聖日耳門又再次擴大比分，並憑尼馬一記助攻助攻古沙華再入一球，令球隊領先至5：2。

去到比賽補時階段，尼馬並無放軟手腳，並且喺對方禁區做成嚴重威脅，雖然有啲幸運嘅成份，但係尼馬卻成功以1敵5，扭過對方5名防守球員，最終以左腳射門得手，就係咁聖日耳門以6：2收獲一場大勝。

全場比賽結束，尼馬一共交出2入球2助攻，表現絕對係全場之冠，特別係最後一個入球，更加係顯示出尼馬嘅個人能力以及膽識，對於佢嘅表現一眾聖日耳門高層亦都拍爛手掌。其實尼馬一直都擁有統治比賽嘅能力，好似今仗如果其他隊友們能夠把握得更好，相信聖日耳門必定可以入多幾球。不過，以往尼馬因為受制於巴塞嘅戰術體系都係圍住美斯，所以尼馬嘅能力一直都唔可以100％發揮出黎，但係宜家已經今時唔同往日，佢可以100％全面爆發，最強嘅尼馬終於誕生啦！