【死過番生】Lamar Odom想以湖人球員身份退役

文：MenClub 波特先生　　圖：互聯網
POSTED ON 31 Aug 2017

Lamar Odom喺NBA征戰期間曾經效力湖人，係湖人2009及2010年成為兩連冠嘅功臣之一，2011年佢亦曾經為湖人奪得過最佳第六人獎項，被譽為「左手魔術手」嘅Odom可以話係NBA歷史上最出色嘅組織型前鋒之一。可惜嘅係，離開湖人後嘅Odom開始沉淪，甚至差一點就斷送生命。不過死神並無將Odom帶走，佢成功逃離鬼門關，如今生活慢慢回復正常，而佢亦希望不久將來可以以湖人球員身份退役。

現年37歲嘅Odom自從2013年起就已經離開NBA，其後曾短暫到西班牙聯賽打球1個月，最終因傷回歸美國。2014年4月Odom成功與紐約人簽約，但最終賽季完結佢都未有機會上陣一場，就係咁佢嘅籃球生涯就結束了。

而黎到今日，相信因為Kobe Bryant嘅關係，Odom回到湖人呢個大家庭，近日有傳Odom希望可以得到湖人一份訓練營合同，以讓他可以以湖人球員身份退役。對此Odom表示:「我的家人比我更期待我可以以湖人球員身份退役，對於能夠簽下一天合同我並沒有太大感覺，但我想當天我會相當怕羞，但那一天是送給我的兒子、家人及粉絲的，他們會享受那一天的到來。」

1999年Odom以首輪第4順位加入快艇，好快佢就展現出佢嘅天賦，喺場上無論得分、助攻還是防守Odom無一不通，佢成為全能型球員嘅代表。2004年，Odom喺O’neal嘅交易中被送至湖人，然後佢就成為左Kobe場上嘅得力助手之一，並喺2009及2010年助湖人連奪兩屆總冠軍。不過由於湖人喺Pau Gasol嘅交易中想用Odom作籌碼之一，呢個決定令Odom難以接受，佢喺2011年決定申請離隊，最終被球隊送至小牛。

離開湖人後，Odom表現立刻大幅下滑，由效力湖人最後一季嘅場均14.4分8.7籃板3助攻，到小牛嘅6.6分4.2籃板1.7助攻，自此佢就開始跌落沉淪嘅境地。2012-13球季，Odom回到母會快艇，雖然佢仍然可以全勤上陣82場比賽，但場均跌落生涯新低的4分。最終，喺效力快艇一季之後，Odom再無得到任何NBA球隊嘅合同，所以被迫離開呢個地方。

就係咁，如果Odom宜家選擇退役，佢只可以係用快艇球員嘅身份退役，所以佢先希望湖人可以同佢簽一日合同，然後宣佈正式退役。其實呢個情況並唔罕見，好似今個夏天塞爾特人就同球隊傳奇Paul Pierce簽左一份一日合同，然後比佢以塞軍球員身份退役，所以相信以Kobe同Odom嘅關係，湖人一定會願意成人之美的。