伊禾比心目中技術最好嘅阿仙奴球員係...？

文：MenClub 波特先生　　圖：互聯網
POSTED ON 17 Nov 2017

阿仙奴近兩季成績雖然無乜特別出色，但係都成功發掘出部份新星，其中喺尼日尼亞出世嘅伊禾比就係其中之一。呢位1996年出生嘅阿仙奴青訓，15-16球季已經開始為一隊上陣，上季更成為主要球員之一。

而近日伊禾比更喺代表尼日尼亞同阿根廷進行嘅友誼賽入面，展示自己出色嘅技術，佢除左個人攻入兩球之外，更有一次成功通左巴塞後防大將馬斯本蘭奴坑渠，令對方相當尷尬。

以伊禾比日漸成熟嘅技術，相信未來佢將會喺阿仙奴前線上重要嘅一員。不過，近日呢位小將被媒體問到有關阿仙奴陣中邊一位球員技術最好，而佢並無好自信咁話係自己，咁究竟佢心目中邊一位檐手球員擁有最高超嘅技術呢？答案就係目前一直處於受傷狀態嘅辛迪卡蘇拿。

伊禾比表示：「好不幸，呢位最好技術嘅球員正受傷，而我講緊嘅就係辛迪卡蘇拿。當我第一時加入球隊嘅時候，我已經感好很驚訝，他的左右腳技術都好好。基於佢嘅能力，我認為佢就係我合作過技術最好嘅球員。」

不過好可惜嘅係，伊禾比口中講緊嘅呢位最好技術嘅球員已經因為受傷超過1年無比賽，佢自從2016年10月受傷以來，已經多次進行手術，其已經多次受傷嘅身體好似已經難以康復一樣，雖然佢目標喺2018年初重返球場，但係並唔樂觀。

今季已經係卡蘇拿喺阿仙奴嘅第6個球季，佢一共為球隊上陣180場攻入29球，其中表現最好嘅係加盟第一季，佢全季一共攻入12球。