重量級世界拳王Anthony Joshua生活奢華卻不用花上1蚊！？

文：MenClub 波特先生　　圖：互聯網
POSTED ON 01 Dec 2017

較早前，三料重量級世界拳王Anthony Joshua喺杜拜嘅帆船酒店直升機坪進行拳擊訓練，令唔少人對呢位28歲拳王更加關注。相信喺唔少人眼中，呢班收入豐厚嘅拳王應該會好似「不敗拳王」Mayweather一樣，鍾意喺生活上豪花自己賺來嘅金錢，但事實上Joshua卻完全顛覆呢個諗法，因為佢生活上基本一蚊都唔使花！

喺2017年，Joshua一共打左兩場拳場，每一場佢都賺到1500萬鎊，亦即係單係今年佢已經憑住比賽賺到3000萬鎊。除此之外，Joshua有12個品牌嘅代言喺身，其中包括積架、Under Armour、愛彼錶等等，所以你可以預想佢一年落黎收入至少達到5000萬鎊。

年收入5000萬鎊，以正常人黎講就算唔會豪使，都總係會買下自己鍾意嘅野，好似車呀、大屋呀等等，但係Joshua卻完全唔係一個正常人，佢竟然完全無花過自己賺番黎嘅一分一毫。作為Joshua身邊嘅左右手，Cunningham透露Joshua嘅生活究竟點樣唔使使錢。

Cunningham表示，從外面人黎睇嘅Joshua，生活其實非常奢華，佢會揸靚車、坐私人飛機、戴名貴手錶等等，但事實上佢係同阿媽一齊住，飛機係贊助商提供的，佢地從來無為坐飛機或直升機比過錢。另外，佢架車都係Land Rover自己提供的，佢完全無用過1蚊，所有收入都只有不斷累積。

同樣，Joshua手上不同嘅名錶，其實都只係贊助商提供的，佢唔會為左呢啲名錶而自淘銀包。而贊助商對Joshua咁死心塌地，除左因為佢戰績出色之外，佢每逢比賽前嘅「過磅」都會帶住贊助商提供嘅名錶，令該品牌能夠展現人前。

未來，相信Joshua嘅人氣只會不斷增加，如果佢能夠挑戰其他重量級嘅拳王嘅同時能夠保持連勝，相信佢嘅收入必定進一步上升，而贊助嘅物品亦會加增，到時佢可能連食都唔使自己比錢，其身家只會有入無出啦。