Kobe認為打籃球最好的特質：好奇心！

文：MenClub 波特先生　　圖：互聯網
POSTED ON 06 Dec 2017

對於一名籃球運動員黎講，有唔少特質你都需要擁有的，好似柔和嘅手感、出色嘅彈跳力、廣闊嘅視野等等。不過以上呢啲可能都係硬件上嘅野，軟件上亦即係心態上有一啲特質卻可以令你變得越黎越強，甚至天空先會係你嘅極限。

今個NBA賽季擁現一班天賦極強嘅新秀，其中好似留級生Ben Simmons咁雖然今季只係佢嘅新秀賽季，但就已經打出全明星級別嘅表現。而另一邊廂，湖人雖然獲得榜眼Lonzo Ball，但呢位話題球員就仲未打出令人順服嘅表現，相反佢嘅另一位新秀隊友Kyle Kuzma卻展現令人驚喜嘅實力及穩定性。

目前為止，Kuzma為湖人上陣左22場比賽，場均上陣30.9分鐘，可以拎到16.8分6.5籃板1.5助攻，投射命中率達到49.8％，三分球命中率則為37.8％。睇番呢份數據，Kuzma已經成為左湖人隊內嘅得分王，並且佢嘅表現亦都係湖人一眾球員中最穩定的，無論係正選定係後備佢都完全交足功課。

由於新秀已經有咁好表現，Kuzma成功引黎湖人傳奇Kobe Bryant嘅關注，甚至與佢二人共進晚餐，以向呢位年輕球員分享心得。

對於呢位只有22歲嘅新秀，Kobe可以話對佢印象相當正面，並且認為佢有一項特質係令到佢生涯初期已經有咁好嘅表現，而呢個特質就係 - 好奇心！

Kobe表示：「佢(Kuzma)可以非常清楚咁表達同討論，我認為最好嘅特質就係好奇心，因為你會想知道事情究竟係點樣發生的。當你擁有咁樣嘅好奇心時，你就會不斷尋求改善嘅方法，無論係精神上定係身體上。呢個就係我喺佢身上見到最突出嘅特質。」

Kobe提到嘅好奇心，確實係對於運動員黎講，特別係籃球員係非常重要的，因為當你有野唔識或者唔明白，你就會不斷去問、不斷去鑽研，然後就算你學識啦，你都會好奇如果將某個技術繼續提升到極致會係點，咁樣你嘅實力就只會不斷增加，然後成為一名無與倫比嘅球員。