【從軍！】菲律賓拳王Manny Pacquiao要全職做軍人？！

文：MenClub 波特先生　　圖：互聯網
POSTED ON 11 Dec 2017

菲律賓拳王Manny Pacquiao近日進入菲律賓陸軍，並正式擔任上校嘅職位。

作為8個級別嘅世界冠軍，Pacquiao近日已經完成遞交文件，會正式協助菲律賓軍方作推廣。

有消息指，如果Pacquiao正式結束自己拳擊手生涯的話，佢將會全心投入到政治生涯，成為軍方嘅要員之一。

另一邊廂，Pacquiao嘅拳擊團隊好希望佢可以同Conor McGregor打番一場，就好似當日Mayweather同Pacquiao及McGregor進行嘅「世紀之戰」一樣，但係目前為止McGregor方面已經單方面拒絕左呢場賽事。

對於舉辦方黎講，其實大家都只係指在搵錢，McGregor只係一名格鬥家，佢並唔擅長拳擊，佢走上擂台同Mayweather根本完全無得打。MMA選手係需要留意踢擊及地板鎖技等，同拳擊完全係兩回事，所以無論McGregor同任何年紀嘅拳擊選手進行拳賽，佢都唔會有能力去勝出。

Pacquiao如今已經38歲，距離退役亦已經越黎越近，今年7月佢同Jeff Horn進行拳賽，喺大戰12回合後佢最後失落左WBO金腰帶。若果Pacquiao真係決定退役，並且真係全時間加入軍隊嘅話，佢絕對可以去指導士兵搏擊能力，咁樣都叫可以將佢嘅拳擊技術傳承落去吧。

Pacquiao嘅陸軍生涯由2006年開始，當時佢以後備軍嘅軍士加入陸軍戰隊，其後同年佢升任為技術軍士。2007年10月，Pacquiao成為陸軍中嘅最高級軍士。去到2009年，菲律賓拳王被任命為高級軍士長及第十五預備軍司令部司令部長。黎到近日，佢亦正式被任命為上校，算係一個頗高的官階。