《週刊少年Jump》50週年特別解答超級撒亞人點解金髮

文：MenClub Mean娜　　圖：互聯網
POSTED ON 22 Mar 2018

相信MenClub有唔少巴打都係《龍珠》嘅粉絲，對於《龍珠》好多故事背景同設定應該相當熟悉。不過你哋又知唔知，點解撒亞人變身做超級撒亞人嘅時候，會連頭髮都變金呢？

話說《週刊少年Jump》50週年有唔少慶祝活動，其中一項就係喺日本節目《NON STOP!》中，邀請咗曾經擔任第11代總編輯嘅中野博之出席，傾下各種關於《週刊少年Jump》嘅話題，而佢就喺呢個環節入面，講解咗點解超級撒亞人會係金髮嘅原因。原來當初鳥山明之所以將超級撒亞人設定為金髮，係因為畫漫畫時可以慳返唔少塗黑嘅時間，提升畫畫效率。因為當時鳥山明同助手成日都好忙，唔想浪費時間將角色頭髮油黑，決定將超級撒亞人設定做金髮，咁表達時就可能直接用白色嚟表現，其他時間就可以專注構思精彩嘅劇情！