《拳願阿修羅》動畫化決定2019年播出！

文：MenClub Mean娜　　圖：互聯網
POSTED ON 26 Mar 2018

《拳願阿修羅》故事講述「拳願競技」係日本大型企業之間嘅一種鬥爭，商人會用巨額去僱用鬥技者，並要求鬥技者赤手空拳去參加對打格鬥競技，而參與「拳願會」嘅大企業可以提議舉辦「拳願絕命淘汰賽」以爭奪會長之位，但如果發起人輸咗，就連擁有嘅企業都一同解散。論名氣，《拳願阿修羅》可能比唔上經典格鬥漫畫《範馬刃牙》，但論人氣就絕不輸蝕！《拳願阿修羅》熱血輕鬆嘅風格，加上用心嘅畫工及出色嘅分鏡，得到唔少讀者歡心。連載期間，《拳願阿修羅》亦有洽談過動畫化嘅決定，只係最後爭唔贏《靈能百分百》，雖然一再傳出《拳願阿修羅》會動畫化，但確實日期一路都未有消息。最近，官方終於公布，《拳願阿修羅》將於2019年播出動畫！

目前有關《拳願阿修羅》動畫化嘅相關消息並唔算多，暫時只係知道由岸誠二負責監督，上江洲誠擔任編審，森田和明擔任角色設定，並由LARX ENTERTAINMENT 負責製作。唔講咁多，一齊睇睇預告片先！