【迎接法網】拿度再奪巴塞隆拿公開賽冠軍！

文：MenClub 波特先生　　圖：互聯網
POSTED ON 30 Apr 2018


5月下旬四大滿貫之一嘅法國網球公開賽就會正式展開，而由於「瑞士天王」費達拿已經宣佈唔會參戰泥地賽，所以賽事大熱門嘅「泥地王」拿度就變得熱上加熱，佢將好大機會生涯第11次奪得呢個賽事嘅冠軍，特別係佢今年復出後喺泥地賽上嘅狀態依舊係無敵！

喺法網舉行前，世界一哥拿度正式復出，並率先參加蒙地卡羅大師賽以調整狀態，最終佢成功生涯第11次奪得呢項賽事冠軍，創下歷史紀錄。而其後，拿度再參加同為泥地賽嘅巴塞隆拿公開賽，希望可以進一步鞏固自己嘅狀態。

喺巴塞隆拿公開賽嘅決賽上，拿度面對一位剛冒起嘅19歲新星Stefanos Tsitsipas，呢位希臘小將喺打入決賽前分別喺八強擊敗3號種子Dominic Thiem，其後又喺四強擊敗5號種子Pablo Carreno Busta，表現令人驚喜，甚至有人期望過呢位新星會唔會有機會將歷史最強嘅「泥地王」拿度擊敗呢？

最終，首次打入ATP巡迴賽決賽嘅Tsitsipas，喺面對拿度嘅時候，唔知係咪因為太緊張嘅關係，呢位小將完全被拿度單方面壓制，實力上嘅差距令人感到意外。最終拿度輕鬆以6:2及6:1直落兩盤輕取對手封王。


雖然決賽被拿度完勝，但Tsitsipas其實已經達到自己生涯最佳成績，而佢喺世界排名方面亦一口氣上升至世界第44位。而球迷們可能對Tsitsipas呢位小將並未有好深嘅認識，要知道佢2016年先正式轉為職業球員，而佢嘅偶像就係費達拿，唔知係咪因為呢個原因，Tsitsipas嘅反手係使用單手擊球的，喺目前黎講係較為少見的。