桌球世錦賽2018黎到尾聲，決賽由兩位「75三傑」威廉斯(Mark Williams)大戰希堅斯(John Higgins)，雖然佢地兩位嘅人氣唔及「火箭」奧蘇利雲，但係呢個戲碼絕對係桌球界嘅夢幻對決之一！

以狀態黎講，兩位球手今季嘅情況非常接近，大家都拎左兩個排名賽冠軍，然後黎到世錦賽竟然喺決賽會師，實在令人心情激動，作為球迷都一定希望睇到兩位傳奇可以合演一場非常緊湊嘅賽事，最後就打足35局先分出勝負。

最終，雙方雖然未有真係打足35局，但係就打到第34局先分到勝負，憑住長台穩定嘅發揮，威廉斯一直佔據住優勢，雖然希堅斯及後發力，局數追得非常貼，但最終威廉斯都係率先贏下18局，以總局數18:16擊敗老對手，捧起生涯第3個世錦賽冠軍，亦都係佢今季第3個排名賽冠軍，同時亦都係佢生涯第21個排名賽冠軍。

睇番呢場比賽，其實以單局嘅發揮黎講，希堅斯表現更強勢，佢喺決賽最高度數嘅一Que曾打出131度，而威廉斯就只係打出118度。另外打出Century breaks及50+ breaks，希堅斯分別打出4次及17次，而威廉斯就只有2次及14次。不過，威廉斯發揮比較平均，並且好早就入局所以搶得優勢，所以打完第3段已經領先至15:10，雖然希堅斯最後強勢追迫，但為時已晚，冠軍都係落入威廉斯手上。

賽後，成功奪冠嘅威廉斯興奮到沖完涼連衫都唔著就直接到記者會上會見記者，原來佢只係為左兌現自己較早前許下嘅承諾，作為一個紳士運動咁樣嘅情況真係非常罕見，可見今次奪冠係幾咁令呢位老將激動！

He's a man of his word...

As promised, Mark Williams has arrived for his press conference as world champion - naked! #bbcsnooker pic.twitter.com/yEF9h2MqMF

— BBC Snooker (@BBCSnooker) May 7, 2018

喺威廉斯奪得世錦賽冠軍之後，「75三傑」合計今季已經拎到10個排名賽冠軍，要知道桌球嘅排名賽其實只有20個，但係呢三個老將竟然拎到當中嘅一半，真係非常恐佈嘅情況，並且絕對可以載入桌球歷史，成為神話一般嘅賽季！