作為一名運動員，可能你會認為擁有出色嘅身體質素係最重要，又或者會覺得擁有高智商會喺某部份運動當中有住壓倒性嘅優勢。不過，仲有一樣特質對於需要運用戰術嘅運動非常重要，呢樣就係記憶力，而要數當今運動員當中擁有最強記憶力嘅就一定要數NBA騎士隊嘅「大帝」LeBron James！

當然你可能會覺得LeBron James咁出眾係憑住其逆天嘅身體質素，導致佢可以喺比賽入面輾壓大部份球員。不過，其實好似LeBron咁擁有勁爆身體質素嘅NBA球員過去絕對係多不勝數，但能夠令佢真正突出人前嘅係佢令人難以置信嘅記憶力。

LeBron嘅記憶力並唔係普通好似你想像中咁記到好多野，佢嘅記憶力可以話係達到過目不忘嘅地步，基本上你問佢任何有關NBA嘅歷史佢一定可以答到你，而微細到可能一場比賽嘅其中一個play係點，LeBron都會牢牢咁記喺個腦入面，只要佢曾經睇過或經歷過。

就好似喺今個東岸決賽入面，LeBron就曾兩次喺記者會中講番比賽入面嘅細節，佢真係可以鉅細無遺毫無遺漏咁講番成個情況出黎。

擁有咁出色嘅記憶力又有咩作用呢？作用就大啦！LeBron對場上嘅任何一人嘅習慣可以話一清二楚，佢會記得每一個球員嘅特性、記得隊友慣常嘅走位、記得所有曾經出現嘅戰術，只要佢想就可以隨時拎出黎執行，所以LeBron可以話喺個腦入面儲起左無數有關籃球嘅數據，所以佢先可以喺比賽中咁壓倒性。

而今日同塞爾特人嘅搶七戰，LeBron James利用經驗成功作客擊敗塞爾特人，連續第8年帶隊殺入總決賽，唔知當中佢又利用左幾多佢嘅記憶力鋒對塞軍從而擊敗佢地呢？