目前NBA總決賽已經進行左兩場，騎士連續兩個作客都敗興而回，所以要後上奪冠嘅可能性唔係無，但機會可以話微乎其微，當然前車可鑑LeBron James曾帶領騎士完成不可能的逆轉，但今年嘅騎士無疑全隊都不在狀態。

如果LeBron最終再次只係拎到亞軍，唔少人都預計佢好大機會再一次離隊，除左因為佢仲想再拎總冠軍之外，其次係因為感覺到佢已經再難Carry呢班球員，基本上全隊真係幫到手嘅隊友就只有Kevin Love一人，面對強大嘅勇士可以見到LeBron係有幾灰。

而就喺騎士輸左Game1之後，有消息指Chris Paul已經開始招募LeBron到火箭打球，試想想CP3、James Harden加埋LeBron，呢個組合係咁幾誇張，但係實際火箭嘅薪酬卻已經難以容納LeBron呢類型嘅頂薪球員。所以據著名體育記者Woj大神透露，如果騎士最終喺總決賽落敗，佢將會同Paul George商量一同加盟湖人。

PG一向係湖人及Kobe Bryant嘅粉絲，所以此前已經有唔少佢傾向加盟湖人嘅消息，而湖人話事人Magic Johnson亦曾因私下招募PG而被罰款，再加上如果能夠同LeBron一齊加盟，相信對於PG嘅吸引力都係非常大的。

另一邊廂嘅LeBron如果今年唔能夠奪冠的話，相信佢未來要帶領呢隊騎士再挑戰總冠軍嘅機會只會變得更加困難，所以「Decision 2.0」係佢其中一個選擇，而湖人處於美國大地市洛彬磯，對於LeBron未來退役後嘅發展有著舉足輕重嘅影響。而能夠同PG一齊打波，再加上一班年輕具潛力嘅球員好似Lonzo Ball同Kyle Kuzma，相信湖人旋即會變成一支冠軍大熱。

當然對於湖人黎講呢個係最理想嘅結果，但實際上LeBron會唔會再離隊真係無人知，因為如果佢再走嘅話對於佢嘅歷史地位會進一步受影響，而同時PG亦曾表達願意留喺雷霆同Russell Westbrook繼續打球，所以究竟事情發展會係點，各位球迷一定要繼續留意！