2010年，效力騎士7個球季嘅LeBron James選擇離隊，將自己嘅天賦帶到熱火，同Dwyane Wade及Chris Bosh組成三巨頭。LeBron當年呢個決定，令佢一時間成為全聯盟嘅針對目標，認為佢抱團、無大志，騎士球迷對佢恨之入骨，甚至燒佢波衫洩憤。

離開騎士4年後，LeBron成功喺熱火拎到兩次總冠軍，然後一個「回家」Decision 2.0決定重投騎士，並揚言一定要為母會奪得一次總冠軍。對於呢次回歸，騎士球迷選擇原諒，而「大帝」亦成功兌現承諾，連續4年帶領球隊殺入總決賽，並喺2016年嘅絕境下奇蹟逆轉勇士，為騎士帶來隊史第一個總冠軍。

而就喺今個總決賽被勇士橫掃後，隨即有唔少聲音叫LeBron離開騎士，因為佢呢班隊友好似真係好難帶得起，而同時亦有指LeBron為左退役後嘅發展，會選擇到洛杉磯繼續球員生涯。最終，正如預測一樣，LeBron嘅Decision 3.0就係決定加盟湖人，同樣選擇離隊但今次騎士球迷反應卻完全唔同。

雖然LeBron曾經拋低騎士，但佢願意回歸並真係帶黎成績及奇蹟，所以一班騎士球迷早已經原諒「大帝」，今次佢選擇再一次離開，甚至可能唔會再番黎，但大部份球迷送上嘅唔再係咒罵，而係祝福及感謝，佢地感謝LeBron呢段時間帶比佢地嘅一切。

LeBron效力騎士總共11個球季，期間常規賽上陣849場，場均可以拎到27.2分7.3籃板7.3助攻，而季後賽則上陣152場，場均可以交出30.1分9.1籃板7.8助攻。「大帝」已經付出所有，相信有睇今年季後賽嘅球迷都可以睇到佢已經傾盡全力，呢個地方對於佢黎講已經無悔無憾。