籃板球從來喺籃球比賽都係非常重要嘅一環，因為防守籃板就係阻止對方獲得二次進攻機會，而進攻籃板就係令己方擁有再一次得分嘅機會。而喺神級籃球漫畫《男兒當入樽》入面就有一句「控制籃板就能夠控制比賽」，說明籃板球究竟有幾重要！

《男兒當入樽》主角櫻木花道雖然只係一個籃球嘅門外漢，但就憑住驚人嘅彈跳力及運動能力，再加上隊長赤木嘅籃板球技術教授，令呢位「天才」成為籃板機器，甚至成為擊敗全國冠軍山王工業嘅重要原因之一。

而日前，菲律賓聯賽就有一位球員Scottie Thompson重現櫻木式搶籃板，佢雖然只有185cm嘅身高，但就以驚人嘅彈跳力從兩位內線球員頭上搶下籃板，呢一搶引爆全場球迷嘅情緒！

睇完呢個鏡頭，真係又忍唔住想大嗌：「我想打籃球呀！」