今年夏天，葡萄牙射手C朗拿度由皇馬轉投祖雲達斯，佢嘅到黎可以話為意甲重新帶黎新氣象，又拎到祖記受到更多球迷嘅關注。唔單只係咁，C朗對祖記嘅球員有住非常正面嘅影響，特別係佢超級專業嘅態度，令一眾新隊友都佩服到五體投地。

加盟祖記都已經有一段時間，C朗亦開始左喺新東家嘅訓練，從較早前嘅祖記發放嘅影片可以睇到，新展開嘅訓練課較為輕鬆，C朗同一班新隊友喺當中亦都非常融洽。

不過當C朗真係開始全心投入訓練，呢位五屆金球獎得主亦正式上力，開始自己一直以黎嘅訓練強度。相信大家睇到呢位即將34歲嘅老將仍然可以保持咁好嘅狀態，都大慨知道佢嘅訓練一定唔係人咁品，但勢估唔到佢嘅訓練強度係恐佈到連其隊友，亦即係職業球員都表示完全跟唔上。

據C朗新隊友杜格拉斯哥斯達表示：「要跟上C朗嘅訓練基本係無可能的。當我地到達訓練現場時，佢已經投入左訓練，但當我地離開嘅時候，佢仲未離開，我從來未見過好似佢咁嘅球員。」

基本上C朗喺賽季備戰或期間，都會全力投入訓練，除左訓覺個幾個鐘之外，其餘時間佢都係用黎訓練，所以就出現哥斯達所講C朗永遠係最早黎，但又最遲走個一位。

C朗訓練日程：

- 每日訓練3-4小時，確保低脂肪水平(少於10％)
- 有氧運動包括幾次跑步，每次持續25-30分鐘
- 短期練習，如高強度短跑練習
- 用於改進控球和技術的技術訓練
- 與隊友保持聯繫或溝通更好的戰術練習
- 在健身室訓練，以保持特定的肌肉，及增加總體力量

以下為C朗其中一日嘅健身室訓練，佢會重覆以下各組訓練3次：

槓鈴深蹲（8次）
跳箱（20英寸，10次）
跳遠（8次）
弓箭步（每條腿8次）
Lateral Bound（12英寸，10次）

就係呢份堅持同努力，C朗先可以由當日個位瘦猛猛嘅小將，變成如今滿身肌肉，狀態完美保持嘅世界最佳球員之一，相信一班祖記隊友見到C朗勢必會被佢帶黎正面嘅影響，更多投入訓練成為更好嘅球員及隊伍。