{ SKIP }
文:MenClub 波特先生  圖:互聯網
POSTED ON 16 Aug 2018

全場比賽精華

尋晚歐洲超級盃上演西甲同城內戰:皇馬vs馬體會,而呢一場喺皇馬自失去領隊施丹及頭號球星C朗拿度後第一場正式比賽,所以唔少球迷都對呢場比賽非常注目,究竟無左C朗嘅皇馬攻擊力會唔會大受打擊呢?新領隊盧比迪古又有幾多斤兩呢?

不過,今仗皇馬核心摩迪被安排先任後備,所以中場線嘅實力明顯會大打折扣,特別係球隊嘅攻防轉換及傳送能力會減低,因此馬體會變相會踢得舒服得多。另一個焦點係,皇馬繼續排上拿華斯擔任正選門將,高圖爾斯則暫時未有機會上陣。

而比賽開始後馬體會一黎就以快打慢,喺皇馬後防仲未站穩陣腳之際前鋒迪亞高哥斯達就喺禁區獲得機會,只見佢一路控球殺向底線,最後怒轟近柱,拿華斯反應唔夠快未能夠阻止個波直飛入網。其後皇馬開始作出反擊,巴利喺右路邊線快放,再以右腳斬中比中間嘅賓施馬,後者成功搶點近門頂入,為皇馬追成平手。

下半場,馬體會後衛謝法倫犯下天條禁區手球,皇馬獲得一次12碼機會,並由隊長沙治奧拉莫斯一射破網,成功反超前2:1。不過相隔10多分鐘,馬體會10號仔安祖哥利亞喺禁區發難,並喺門前底線成功橫傳比哥斯達,後者近門射個掛網波,助馬體會成功扳平!

之後法定時間雙方再無入球,所以比賽需要進入加時分勝負。進入加時賽,皇馬其實都擁有更高嘅控球率,不過把握力明顯不足。反而馬體會憑住尼古斯嘅左腳窩利世界波,及高基嘅快腳射門連入兩球,最終以4:2殺死比賽,並且報番之前喺歐聯決賽嘅一戰之仇。

今仗皇馬全場有多達14次射門,但係中龍就只有6次,入球亦只有2個,相反馬體會雖然只有8次射門,但就有5次中龍,最終高效換黎4個入球,可見雙方把握力嘅分野都幾大。

而有咁大嘅分野,亦令人隨即想起C朗拿度,要知道呢位葡萄牙射手可以話係當今門前把握力最強嘅球員,佢可以將一啲本黎五五波嘅機會轉化為入球,但係無左佢之後年輕球員阿辛斯奧明顯未能夠有效取代其位置,喺比賽精華入面都見到佢嘅攻門都係差少少,唔知一眾皇馬球迷會唔會非常掛住呢位5屆金球獎得主呢?

相信聯賽展開後,大家可以再慢慢睇清楚皇馬嘅鋒線究竟可唔可以踢出熱身賽嘅表現,但係明顯喺面對強隊嘅時候,佢地嘅把握力將成為比賽嘅關鍵,如果三位箭頭唔能夠合力提升入球能力,咁相信無左C朗嘅差距就會慢慢被放大了。

今次推出嘅「Figuarts ZERO 超激戰 超級撒亞人格比達 - 復活的融合」除咗個名長啲之外,隻Figure本身都比上次出嘅更加吸引!
hobby
【龍珠】Figuart Zero 超激戰 28cm高格比達
03 Jul 2020
但起碼可以確定《Mindhunter》仲未「壽終正寢」
hobby
【Netflix】攝影師透露 《Mindhunter》第三集仍然未定
03 Jul 2020