時間真係話得好快，英超話咁快就已經進行至第二輪，而呢一週可以話爆出一個冷門，就係「紅魔鬼」曼聯作客竟然以2:3不敵上季嘅下游球隊白禮頓，令人擔心本來已經問顯多多嘅領隊摩連奴究竟仲可以喺曼聯坐幾耐。

摩連奴雖然係一名著名領隊，獲獎無數，但係近年執教風格只係以「泊大巴」聞名，無論係對手定係球迷都對佢越黎越不屑，甚至有傳連陣中球員都開始有啲控制不住，對摩帥已經有不滿之情。

而英超上週正式開鑼，曼聯面對李斯特城成功以2:1獲勝，取得開門紅，但係岩岩尋日面對首週不敵屈福特嘅白禮頓，曼聯竟然連番失球，後防錯漏白出，最終以2:3落敗，爆出今季英超暫時最大嘅冷門，摩帥絕對係責無旁貸。

睇番呢場比賽嘅數據，其實曼聯控球率高達66％，但係就只有8次射門3次中龍，而前鋒盧卡古同邊鋒馬斯亞呢對攻堅組合竟然喺頭60分鐘無一次互相傳球，可以說明佢地嘅連結配合係完全失敗的，亦都係曼聯攻力不足嘅原因之一，最終摩帥喺60分鐘將馬斯亞替換下場。

攻力不足係問題，但係防守問題先係致命傷，要知道摩帥鍾意「泊大巴」著重防守，就係想先穩守再尋求破門嘅機會，但係佢面對實力不強嘅白禮頓竟然都可以失3球，今場兩位中堅拜利同連達洛夫嘅防守絕對係令人失望的，其中好似第一個失波竟然可以被對手前鋒咁樣從中鍥入得手，實在係難辭其咎。

而門將迪基亞雖然可以話三個入波都唔可以全然怪佢，但係佢近14次(包括世界盃期間)被對手射中龍嘅同時，竟然失左10球，亦即係只要可以射中龍，就有超過7成機會喺迪基亞身上取得入球，呢位曾經嘅「神龍」如今好似失去左光環一樣。當然，佢門前嘅後防仍然可能係拖佢後腿嘅主要原因之一。

雖然如今只係開季，但係摩連奴喺曼聯嘅處境已經黎到最危急關頭之際，無論內憂定外患都已經響起警號，究竟佢仲可以坐住「紅魔鬼」領隊呢個位置幾耐呢？球隊會唔會繼續長期比機會佢呢？

而此前已經有消息指前皇馬領隊施丹對曼聯領隊嘅位置有興趣，曼聯高層會否放手一搏放棄摩帥，起用呢位為皇馬連奪三屆歐聯冠軍嘅傳奇球員兼領隊呢？各位紅魔迷你地又點揀呢？