林寶堅尼相信喺唔少人眼中都係夢寐以求嘅Dream Car，不過一部林寶閒閒地都幾十萬，甚至幾百萬不等，所以要入手一部對於我地呢班升斗市民黎講真係談何容易。不過，近期卻有人將一部價值20萬英鎊(約200萬港元)嘅林寶棄之不顧，佢就係前韋斯咸球員沙高(Diafra Sakho)。

有消息指，喺去年春天開始，一部林寶堅尼就停泊喺韋斯咸嘅訓練場外，而經一問後原來呢部supercar嘅主人喺已經離開球隊3個月嘅前鋒沙高的。

知情人事透露，沙高當日買左呢部林寶之後就放佢喺呢個位置，然後一直非常浪費咁無揸過佢，而其他經過車身邊嘅人都會過去睇下。

現年28歲嘅沙高，2014年從法甲球隊梅斯加盟韋斯咸，雙方簽訂4年合同，但薪酬卻未有對外公佈。如今，沙高已經轉投法甲嘅雷恩，並喺今年夏天被外借至土耳其球隊貝沙體育，亦即係話佢離開呢部林寶變得更加遠了。

雖然可能沙高嘅收入絕對負擔得起去浪費呢部林寶堅尼，但係咁樣將佢停泊喺舊東家嘅訓練場前，並置之不理，實在有點兒不負責任，更重要嘅係你咁浪費不如比左部車我啦！

不過其實沙高已經唔係第一次苦待林寶堅尼，佢此前試過揸住林寶發生意外，導致部車車頭嚴重損毀。諗深一層，可能就係因為呢次車禍令沙高唔敢再林寶。