巴西傳奇「細哨」朗拿甸奴一直都係快樂足球嘅代表，佢嘅比賽總係帶住笑容，為一眾球迷帶黎魔術般的快樂。不過，近期呢位快樂掌門人可能就唔太快樂啦，因為有消息指佢嘅銀行戶口得番9美金！

現年38歲嘅「細哨」較早前喺自己嘅家鄉進行建設，但由於涉嫌造成生態破壞，所以被當局判處巨額罰款。雖然「細哨」已經隨即抵押自己嘅房屋以還債，但係據報因為利息太高而令佢無辦法還清款項。

而據調查其財務狀況後，當局發現「細哨」嘅銀行房口得番9.45美金，所以隨即沒收其護照，確保佢唔能夠離開巴西。

作為曾經喺地球上最出色嘅足球員，朗拿甸奴被稱為球場魔術師，佢嘅腳法華麗又實用，令球迷們看得如痴如醉，佢曾經帶領巴塞奪得歐聯冠軍，又協助巴西奪得2002年世界盃冠軍，自己亦曾奪得金球獎。

雖然驟眼睇「細哨」銀行只係得番9美金，但係佢近期一直都喺中國及日本出席活動，點睇都唔似完全無晒錢，要知道佢受邀出席活動一定有唔少收入，所以其財務狀況絕對令人質疑。