較早前，Jimmy Butler正式被交易至76人，自認為係木狼真核嘅佢與兩位木狼年輕核心Karl-Anthony Towns及Andrew Wiggins並唔夾，間接令後兩人喺場上表現綁手綁腳，而木狼嘅表現亦持續令人失望。

如今Butler離開，木狼表現終於漸見起色，特別係Towns就有如重生一樣，過去4場連續取得超過20分，而球隊亦取得3勝1負嘅戰績。

雖然Towns表現回勇帶領球隊取得不錯成績，但係木狼真正令人驚喜又或者真真正正嘅核心，其實係前MVP Derrick Rose。

Rose今季上陣左18場比賽，其中5場為正選上陣，平均可以取得19.5分4.6助攻3.6籃板，命中率達到49.2%，三分球命中率亦高達47.8%，係球隊嘅第二得分點，比正選嘅Andrew Wiggins更加搶眼及穩定得多。對於目前沒有了Butler木狼嘅情況，Rose表示因為球隊節奏已經統一，所以表現會越來越好！

再睇Rose今季目前嘅PER效率值，竟然高達20.53，排名全NBA控衛第7位，比Kyle Lowry、Mike Conley、Chris Paul、Ben Simmons及John Wall等頂級控衛更加高效實用。

曾經兩度大傷，由MVP級別重重跌落凡間，跌職業生涯甚至亮起紅燈，但呢一切都無阻Rose前進，偶有迷失但撥亂反正，如今再次步入正軌。雖然唔少人都話Rose能夠健康打球已經足夠，但作為籃球員要求進步係基本心態，所以曾經歷高山低谷，由零開始的Rose，如今已經唔再只係想打波，佢更加想越打越好，帶領球隊殺入季後賽，甚至挑戰總冠軍！