據最新嘅消息指，皇家馬德里有意收購對熱刺丹麥中場艾歷臣(Christian Eriksen)，但係後者為呢位核心球員開出天價轉會費：2.5億歐元！

今季皇馬經歷大變，領隊施丹離任、C朗被賣至祖雲達斯，球隊戰績插水式下跌，目前西甲只係排在第6位。其中最重要嘅原因除左因為失去C朗之外，球隊平均年齡過高失去活力亦都係一大問題，所以球隊方面已經銳意要換血。

作為球隊中場大腦之一，摩歷如今已經33歲，雖然今年仍然好大機會奪得金球獎，但係近期嘅表現卻難以令人滿意，所以皇馬方面已經想更換呢位核心。而佢地目前心儀嘅首選係熱刺嘅丹麥中場艾歷臣，呢位中場目前正處於自己嘅球員生涯嘅黃金時期。

對於皇馬嘅收購行動，熱刺方面並未完全拒絕，但就隨即開出天價2.5億歐元轉會費，明顯係想皇馬知難而退。不過，艾歷臣同熱刺嘅合同2020年夏天就會到期，所以如果球隊未能同佢順利續約，咁樣熱刺隨時要大劈價賣人，否則結果可能係人財兩失。

而唔單只合同問題，艾歷臣目前喺熱刺只係得7萬鎊週薪，即使續約人工亦未必可以高得去邊，呢一點將成皇馬搶人關鍵，因為佢地絕對可以為艾歷臣開出巨額薪酬。屆時如果艾歷臣真係想走人，咁樣隨時可能同熱刺玩野，迫球隊將佢賣比皇馬，就好似當日巴利要離開熱刺加盟皇馬一樣。