較早前，「不敗拳王」Mayweather接受邀請與只有20歲嘅日本神童那須川天心進行一場拳擊較量，最終Mayweather憑住一面倒嘅規則壓倒性地擊敗天心，後者落敗後喺台上淚流滿面。

與Mayweather一戰後，那須川天心明顯為世界所認識，連MMA明星選手「寸咀拳王」McGregor亦都格外留意呢位年輕選手，並隨即向對方進行挑戰，希望與之進行比賽。

自從2017年與Mayweather進行左「世紀之戰」後，McGregor變得無人不識，基本上有McGregor嘅比賽都坐無虛席，係UFC嘅台柱選手。

而今次，McGregor希望去到日本東京與那須川天心比賽，規例以MMA形式，時間則喺今年夏天之前，希望那須川天心那一方能夠安排比賽。

對於McGregor嘅挑戰，那須川天心以正面回應，但今次佢明顯吸收上一次完敗給Mayweather嘅經驗，因為佢只係接受相同重量級別嘅對等比賽。

那須川天心平常都係參與122-126磅嘅等級，但Mayweather則係147磅，所以Mayweather在身型體格擁有絕對優勢。而McGregor嘅體型則更加巨大，如今嘅佢體重接近170磅，足足比那須川天心多出40多磅，試問咁樣如何打得動佢呢？調轉黎講，McGregor要想減重達到天心嘅等級亦都基本上係無可能，因為突然失去40幾磅絕對係令佢命都無。

另外，作為Kickboxing選手嘅那須川天心亦都強調，如果McGregor接受比賽，則需要以Kickboxing方式進行，亦即係話唔比使用MMA經常出現嘅絞殺技。因此，睇黎McGregor要想同天心同場獻技應該都無咩機會啦！