今日網壇傳來一單大消息，就係人稱「四大天王」之一嘅梅利(Andy Murray)，突然召開記者會宣佈一個巨大消息，就係佢決定喺今年澳網之後退役！

梅利喺記者會上，宣佈自己將於即將喺今年1月14日舉行嘅澳網後退役，期間佢多次忍唔住失控流淚哭泣。梅利表示自己係受髖關節傷病嘅折磨，已經受左大約20個月嘅疼痛，所以經過與團隊嘅商談後，如果傷痛不止佢覺得係時候停落黎，要知道佢而家係連基本嘅生活動作亦會感到疼痛。

本來，梅利都想戰至幾個月後嘅溫網，但係佢認為澳網可能係佢職業生涯嘅最後一站了。而未來佢會再接受一次手術，但並唔係為左重返賽場，而只係為未來嘅生活可以回復正常。

現年31歲嘅梅利係曾經與費達拿、拿度及祖高域並稱為網壇「四大天王」，佢過去曾奪得溫網(2次)及美網冠軍，而奧運會中更兩奪金牌，世界排名最高曾達到第1位，但如今嘅佢卻已經跌至第230位。