由於戰績不濟，曼聯較早前決定辭退領隊摩連奴，並換上前球員蘇斯克查作臨時領隊，球隊隨即谷底反彈，令唔少人都對摩帥嘅領軍能力作出質疑。不過，當你知道摩連奴從曼聯身上獲得嘅解約金，你就可以知道佢其實係一名真正嘅贏家。

1960萬鎊，係曼聯日前公佈支付比摩連奴及其團隊嘅解約金，據報摩連奴個人可以獲得當中的1500萬鎊，呢個已經係一個不菲嘅數目。

再睇番摩帥以往被炒嘅紀錄，佢喺2007年被車路士第一次辭退嘅時候獲得1800萬鎊嘅解約金，其後離開皇馬時則拎到1700萬鎊，而第二次被車路士辭退時則再拎到1250萬鎊，再加埋曼聯今次嘅1500萬鎊，摩帥一路以黎獲得嘅解約金已經達到6250萬鎊，亦即係超過6億港元。

咁樣你仲會覺得摩連奴係失敗者嗎？

事實上，摩連奴可以話係成功得快，亦都失敗得快。每一次執教起一支新球隊，摩帥都可以令球隊獲得理想嘅成績，就好似為車路士帶來英超冠軍、盃賽冠軍；國米時期嘅三冠王；皇馬嘅西甲、國王盃冠軍；曼聯嘅歐霸盃、聯賽盃冠軍。但相隔三年後，佢就會開始控制唔到更衣室，與球員嘅關係變差，球隊戰績下跌，最終只能夠將佢辭退。

只能夠講，摩連奴係一名真正嘅玩家，佢可以為球隊帶來成績冠軍，又可以為自己帶來巨額收入，實在令人又愛又恨。