首回合主場在奧脫福0:2落敗後，基本上無咩邊個會認為曼聯能夠在次回合逆轉晉級，包括部份曼聯球迷，佢地覺得球隊在歐冠盃能夠認清實力，為來季準備可能更好。不過「足球是圓的」一直適用，包括尋晚嘅呢場曼聯作客巴黎聖日耳門嘅歐冠盃16強次回合。

作為主隊，PSG繼續排出麥巴比一個作為單箭頭，上仗憑住其出色嘅速度及技術，為球隊帶來勝利，今仗當然諗住食過翻尋味。但係與首回合唔同嘅係，曼聯領隊蘇斯克查卻繼續起用盧卡古作正選中鋒，就係靠住「渣古」呢一點曼聯好快就已經獲得甜頭。

就喺比賽開賽未夠2分鐘嘅時候，盧卡古憑住個人身體質素成功衝破PSG防線，並避開後衛及門將保方嘅雙人截擊，最終訓身一射成功破網。

不過，好快麥巴比一次禁區內嘅落地出波，班列特後上接應近門射入，為PSG再次穩住領先優勢，因為呢個時候曼聯要至少再入兩球先有機會出線。

上半場30分鐘，曼聯再次獲得機會，拉舒福特禁區外施放冷箭，由於個波喺保方門前突然彈左一下地，所以令佢判斷失誤未有抱實個波，呢個時候盧卡古插上執雞，成功再入一球，令曼聯再次追到只係落後一球。

戰至下半場，其實PSG一直都有唔少攻勢，但就係唔能夠再入球，最終機會落入曼聯手上。補時階段，達洛特一次禁區外施射竟然意外射中PSG中堅甘佩比嘅手臂，曼聯球員投訴下球證決定睇VAR進行判決，最終球證判定為手球，曼聯獲得12碼，並由拉舒福特一蹴而中，成功絕殺PSG。

賽後，今仗未能上陣嘅PSG球星尼馬就認為球證嘅判決錯誤，認為球證根本唔識睇VAR，並堅持球並拿無打中手。

另一邊廂嘅曼聯領隊蘇斯克查就與恩師費格遜及球隊傳奇簡東拿一齊慶祝呢場逆轉勝利！