一對正常嘅籃球鞋基本上都係值幾百蚊，以至幾千蚊，而如果係一對曾經被球星著過嘅籃球鞋，價值則可能高上幾倍。不過，如果係一對比球星著爛嘅籃球鞋，你又有無諗過佢嘅價值會係幾多？答案可能係比原來升值超過2000幾倍！

唔知大家仲記唔記得，喺較早前一場萬眾矚目嘅NCAA賽事：杜克大學 vs 北卡大學，杜克大學核心Zion Williamson喺上陣唔夠1分鐘嘅情況下，因為一次轉身竟將自己腳下嘅Nike PG2.5踩爆，同時因此而扭傷被迫退下火線。

而就喺Williamson踩爆鞋之後，據消息指Nike方面隨即派人黎搵K教練，並希望檢查Williamson嘅籃球鞋，睇下究竟當中發生左咩事。不過，最後發現呢對被Williamson踩爆嘅籃球鞋已經唔知去左邊。

其後有媒體盡力去尋拎鞋嘅下落，但最終佢地問左Williamson、杜克球隊嘅球員、Nike等都無人知道對鞋嘅下落。

最終，媒體更打去查問運動紀念品拍賣公司查問，呢間公司較早前先幫「天勾」Jabbar完成其個人物品拍賣，並拍賣出超過300萬美元。而呢間拍賣公司表示，佢地手頭上亦都無呢對鞋嘅消息，但係佢地估計，呢對被Williamson踩爆嘅籃球鞋估值應該超過25萬美元，亦即係接近200萬港元！

不過最後嘅問題係，究竟對鞋邊個拎走左呢？