奇諾李維斯的電單車人生

文：MenClub 魏文青　　
POSTED ON 17 Apr 2019

奇諾李維斯鍾意電單車相信好多人都知，佢仲鍾意到同朋友成立自己嘅電單車品牌Arch Motorcycle，每次講起電單車都開心到成個小朋友咁。近日佢就接受外國傳媒訪問，由佢點學電單車開始，講到佢公司，最後仲畀咗啲建議新「騎士」！

Keanu話佢十歲左右住喺多倫多New Yorkville附近時，每個夏天都會見到好多鐵騎士經過，或者就係當時令佢對電單車產生興趣。到1986年左右，當時佢喺德國慕尼黑拍緊嘢，片場有一位「年輕女性」擁有一部Kawasaki的Enduro，於是佢就叫人教佢揸電單車，到拍完返到去洛杉磯，佢就買咗人生第一部屬於自己嘅電單車。

其後於1987年，佢再買咗部1973年嘅Norton Commando，並一直保存到今時今日，據報喺洛杉磯街頭都有可能見到Keanu揸住呢部嘢四圍去。另外Keanu亦在《連鎖反應 (Chain Reacrtion)》、《不羈的天空 (My Own Private Idaho)》等電影中騎過電單車，Keanu更回憶當年拍《不》時，電影人員推出一部黃色嘅Norton，驚佢唔識揸諗住教佢，結果Keanu好有信心咁講咗句「I Got This」，然後就載住戲中另一演員River Phoenix拍好場戲。

Keanu嘅另一電單車收藏就係2004年拍攝《Matrix Reloaded》時嘅特別版Ducati 998，顏色係《Matrix》嘅標誌性綠色，車尾有《Matrix Reloaded》嘅標誌。值得一提係戲中揸呢部車嘅人唔Keanu，而係飾演Trinity嘅Carrie-Anne Moss，而據Keanu所講，當時Carrie-Anne係從未揸過電單車，為咗套戲第一次揸就係一部Ducati 998。部電單車實際上係由《Matrix》導演華卓斯基姊妹(當時係兄弟)擁有，Keanu只係「監護人」，但經過檢查後遲啲有可能會帶佢上賽道。

訪問最後Keanu被問到「給電單車新手嘅建議」，佢就叫大家循序漸進，先搵部細cc、你兩隻腳掂到地、馬力唔會大到嚇親你嘅電單車。就算你真係唔想聽，Keanu都話唔好「Go crazy」，唔好一黎就揸部超大馬力啡鈴跑車，最緊要你揸得舒服，開心就得啦！訪問中Keanu仲有介紹佢嘅Arch Motorcycle推出嘅電單車型號，想知道全個訪問就要睇片啦。