桌球世錦賽2019首圈好快就出現一個大冷門，嚴格黎講呢個可能甚至選得上係世紀大冷門，因為世界第一嘅「火箭」奧蘇利雲竟然首圈即告出局，而擊敗佢嘅更加世錦賽歷史第一位打入正賽嘅業餘球手James Cahill。

喺世錦賽開打前，5屆世錦賽冠軍、同時重登世界第一、狀態爆燈嘅「火箭」係賽事嘅第一大熱門，外界一致睇好佢將好大機會繼2013年後第六次奪得賽事冠軍。而抽籤後，「火箭」首圈嘅對手只係藉藉無名，甚至只係一名業餘球手嘅Cahill，基本上無人會覺得「火箭」會遇上咩麻煩。

但係點諗都諗唔到，第一日面對Cahill，「火箭」已經遇上麻煩，呢位世界第一球手完全不在狀態，出桿隨意，表現完全達唔到其應有水平，甚至連平均水平都達唔到。把握住「火箭」不在狀態嘅情況，Cahill成功取得優勢，並以5:4稍稍取得領先。

而第二日賽事，可以見到奧蘇利雲剪左個新髮型，明顯係展示自己要逆轉嘅決心。而佢一上場就打出一桿97度，將比賽扳成5:5平手。不過原來呢一局「火箭」只係虛火，之後佢又再次走神，被Cahill連續贏下三局，將局數領先至8:5。

不過，能夠擊敗世界第一嘅機擺在眼前，Cahill難免開始緊張及感到壓力，其失誤因此而增多，令「火箭」有機會從後趕上，其中兩局佢分別打出一桿104及87度，從而追成8:8平手。而黎到緊張關頭，「火箭」本有機會反超Cahill贏下第17局的，但係佢竟然打失關鍵一球，將呢一局嘅勝利拱手相讓。第18局，雖然「火箭」率先上手取分，但係卻喺局中出現失誤，令Cahill再度獲得主動權，最終成功清檯，並爆出世紀大冷門，以業餘球手身份擊敗奧蘇利雲。

賽後，「火箭」表示自己四肢都覺得異常沉重，雖然精神還可以，但係身體並不在狀態。而今次首圈出局，亦都被「火箭」自己說中了，就係一係就贏冠軍，一係早早出局睇波好過。