巴西球星尼馬過去一年可以話係佢球員生涯嘅一個低潮，無論係喺世界盃，又或者球會，佢都未能拎出令人順服嘅表現，並且傷患增多令其上陣時間大減，大部份球迷記得嘅只有其在球場上滾動嘅時刻。

而喺岩岩嘅法國盃決賽，作為聯賽冠軍嘅巴黎聖日耳門面對聯賽中游球隊雷恩，理論上真係無得輸。但果然波係圓嘅，PSG竟然喺上半場兩球領先下，下半場連失兩球被對方扳平，最後雙方需要以互射12碼定勝負，而PSG球員喺第六輪即時死亡下射失，因此PSG痛失盃賽冠軍。

輸波下最忌就係輸波兼輸品，作為PSG理論上嘅頭牌球員，尼馬被拍到喺球場觀眾席上與球迷發生爭執，並竟然出手打該名球迷嘅頭部，當然該名球迷應該向尼馬講左啲挑釁嘅說話，但係始終作為球員尼馬應該要控制住自己的。

暫時未知尼馬會被法甲方面如何處罰，但係尼馬禍不單行嘅呢一年總算過去。睇番過去呢一年，尼馬各方面都未能盡如其心意。

首先去年世界盃雖然成功復出參戰，但最終卻只能夠助巴西踢至8強，最終敗喺比利時腳下。而尼馬嘅表現相信大家都唔會有太大印象，反而對佢最有印象嘅只有誇張嘅滾地動作。

而喺聯賽方面，尼馬下半季因傷大部份時間缺陣，期間隊內地位被年輕天才射手麥巴比搶去，後者成為球隊嘅絕對核心，其表現亦獲得大部份人的肯定。尼馬回來後，麥巴比地位並未有太大動搖，尼馬彷彿已經變成了球隊嘅配角，去輔助麥巴比一樣。

歐聯方面，當時嘅尼馬正處於休養階段，所以喺16強面對曼聯嘅關鍵比賽中，尼馬只能夠作壁上觀，最終佢親眼目睹球隊被紅魔鬼完成逆轉，而自己完全無能為力。

更令尼馬雪上加霜嘅係，因為喺球隊歐聯出局後喺網上抨擊球證，佢已經被歐洲足協判罰歐聯停賽三場，即係話來季嘅歐聯尼馬將會缺陣頭三場小組賽。

唔單止球迷嘅嫌棄，尼馬球場上嘅表現亦人失望，究竟來季佢能否強勢回歸呢？佢又能唔能夠贏番球迷一點點嘅支持呢？