歐冠盃四強首回合話咁快就會展開，其中利物浦vs巴塞隆拿相信係更為受矚目嘅賽事，而擁有美斯嘅巴塞能否攻破由狀態出色嘅雲迪積克鎮守嘅利記後防亦成為焦點。

要頂得住美斯嘅進攻，相信係絕大部份球隊面對巴塞時嘅首要問題，基本上阻止美斯最好嘅方法可能就只有犯規。不過，雲迪積克賽前卻相當有信心，佢認為球隊並唔怕美斯，並有能力令對方毫無作為。

雖然自信滿滿，但係雲迪積克亦都向美斯大派高帽：「我認為美斯係世界上最出色嘅球員，但係你睇我地比賽入面嘅防守，我地唔係一對一咁防守，我地係整體性咁防守的，進攻亦都係整體咁進攻的，所以我地擁有足夠的競爭力，我地已經準倫就緒！」

「而現在嘅情況就係我地將於歐聯四強面對巴塞隆拿，我地將面對世界最出色嘅球員，但唔單止係佢，佢地一整隊亦都非常高水平。我地會準備好，而我地亦都係一支出色嘅球隊，因此我地亦都有足夠的競爭能力，我地並唔係去魯營球場渡假的。」

要想阻止美斯，的確好難單憑一個人去完全制止佢，所以一定要靠整體去限制住巴塞，要盡量截斷比美斯嘅輸送，盡量喺巴塞進攻時比壓力佢地，而呢一點亦可能係領隊高普最擅長嘅事，因為前場迫搶係其最拿手嘅絕活。究竟利物浦係咪真係夠巴塞打呢？大家拭目以待吧！