今季英超即將進入煞科戰，同時聯賽冠軍亦將鬥至最後一場，究竟會係曼城以98分高分奪冠，定還是利物浦奇蹟最後一週歷史性奪冠呢？相信球迷好耐未見過英超鬥得咁刺激啦！

尋晚相信一班利物浦球迷應該全部變晒李斯特城嘅球迷，因為利迷一定寄望李城可以令曼城失分，因為咁樣先可以令落後1分嘅佢地再次喺積分上領先。不過好可惜，曼城憑住中堅甘賓尼嘅超級世界波，一球擊敗李城。

有趣嘅係，曼城唔少球員賽後都表達喺甘賓尼起腳嘅時候心入面都大叫：「唔好呀！千祈唔好射呀！點解你要射門呀？！」甚至連領隊哥迪奧拿賽後亦承認當時佢只希望甘賓尼唔好射，要去傳球。但就係甘賓尼呢一腳，曼城成功全取關鍵三分，令佢地獲得最後煞科戰奪冠嘅主動權。

而曼城擊敗李城後，暫以95分高據聯賽榜首，領先利物浦1分，只要佢地能夠喺最後一場擊敗白禮頓，咁樣佢地自然就會成為冠軍。而如果曼城被迫和或落敗，而利物浦能夠擊敗狼隊，咁樣利記就會歷史性首次奪得英超聯賽冠軍。

當然，仲有其他可能性的，就係曼城輸比白禮頓，但利物浦被狼隊迫和，咁樣雙方嘅積分就會相同，屆時就會以得分球差定聯賽冠軍，而現時得失球黎講曼城暫領先利物浦4球，所以如果曼城只係小敗，咁樣奪冠嘅依然係曼城。

如果曼城最終真係能夠奪得今屆英超冠軍，甘賓尼呢一腳世界波真係可以話係曼城今季最重要嘅入球之一，唔知最後會唔會成為今屆英超嘅最佳入球呢？