作為《新世紀福音戰士 (Neon Genesis Evangelion)》嘅忠實 Fans 點會唔想住喺一間 EVA 主題屋，日前日本網民發現咗一間位於日本群馬縣嘅出租屋，而屋內裝修竟然用上 EVA 主題設計，位於廳內有度大門寫上 EVA 基地紅字「入室」兩個字，一打開原來入面更精彩！除此之外，屋內嘅開放式廚房都用上 EVA 咗元素，全屋面積441呎，月租都只係45,000 yen，即係約港幣$3,200，相信喺香港只係租到劏房單位。

要搵間平靚正嘅單位租住唔容易，而要搵間有自己喜歡嘅動漫主題單位租住更加唔容易！日前日本網友 @000calimero000 喺網上發現到，一間位於日本群馬縣前橋市上新田町外表平平無奇嘅住宅，原來內裡充滿咗《新世紀福音戰士》主題裝修。由大門一步入玄關位望向左邊已經可以見到用上 EVA 咗設計嘅開放式廚房，不論廚櫃、抽油煙機位置都有 EVA 元素，而廚房旁嘅大門更有 EVA 基地紅字「入室」兩個字！

一打開印有「入室」嘅大門原來內有乾坤！呢間係屋內兩個房間嘅其中一間，大門嘅另一面印有「出擊」二字，啫係當你步出房門已經可幻想自己係 EVA 內嘅動漫角色出擊迎戰「使徒」。房內所有牆身，以天花、地板都用上 EVA 元素設計，非常有 NERV 總部設計風格，其中面向房門嘅牆身用上黑紅色設計，並由牆壁延伸至天花，其餘牆壁就上灰色設計，而地板就用上工業風嘅鋼板設計。

不過驚喜點止咁少，除咗由客廳步入房間會「嘩一聲」外，原來打開衣櫃門都一樣充滿 EVA 元素！原來衣櫃內印有 EVA 基地紅字「機密」兩個字，有網民笑指呢個單位係 NERV 群馬縣分部。

屋內主題房間只有一個，另一房間用上普通裝修，適合 EVA Fans 與唔係 Fans 嘅友人一同租住，不過呢個單位月租連管理費都只係45,000 yen，一個人畀都可以負擔得起。全屋面積441呎，分別有一個洗手間及開放式廚房，並設有兩個房間，其中一個就係上文介紹嘅 EVA 主題房。

來源：Lifull Home’s