喺英國舉行嘅WBSS (World Boxing Super Series) Bantamweight級別賽事，日本綽號「怪物」嘅井上尚彌成功殺入決賽，對手將會係「菲律賓閃電」Nonito Donaire，屆時勝出嘅一方將有機會同時奪得5條Bantamweight級別嘅世界拳王金腰帶！

而睇番井上喺WBSS一路晉級嘅表現，簡直可以用無敵黎形容，亦都配合其「怪物」之名，其對手根本試唔到佢上限。首回合嘅對手Juan Carlos Payano，井上第一回合已經將其KO，對手完全係少少威脅都比唔到佢。

去到第二回合，亦都係賽事嘅準決賽，井上面對波多黎各嘅拳王Emmanuel Rodriguez(IBF世界冠軍)，本身以為雙方都應該會有得鬥下，點知比賽好快再次落入井上嘅控制！第一回合井上已經用速度多次擊中Rodriguez頭部，甚至將其擊倒在地上。雖然係咁，但係井上第一回合仍然未能將對手KO，但明顯佢已經主導左比賽。

第二回合一番黎，井上嘅攻擊更主動，並以組合拳多番擊中Rodriguez，甚至將其打至流鼻血，表情非常痛苦。雖然Rodriguez之後可以企番起身繼續比賽，但井上得勢不饒人下使出連環拳再次將Rodriguez打倒在地，而裁判確認後判井上KO取勝。

擊敗Rodriguez後，井上戰績提升至18戰全勝(16KO)，而佢黎緊決賽嘅對手Donaire戰績則為40勝5負(26KO)。雖然經驗老到，但係Donarie比井上大上10歲，體能及速度上可能與對方有點距離，因此井上獲得絕對係更大呼聲。而賽事嘅冠軍，將會同時奪得WBO、IBF、WBA(Super)、WBA(Regular)、The Ring Bantamweight級別嘅世界冠軍腰帶！